भजनी नगरके पहिल निर्णयः टीकापुर राजनीतिक घटना हो
पहुरा समाचारदाता
धनगढी, १० जेठ । कैलालीके भजनी नगरपालिकाके नगरप्रमुख, उपप्रमुख, वडा अध्यक्ष लगायत जनप्रतिनिधीहुक्रे पद तथा गोपनियताके सपथ ग्रहण सँगे पदभार ग्रहण करले बाटै ।
नगरप्रमुख केवल चौधरी पदभार कैटी भजनी नगरपालिकाके समग्र विकासके लाग सक्कु नगरबासीनके साथ सहयोग आवश्यक रहल बटैलै । ओस्टके उहाँ भजनी नगरहे ग्रीन नगरके रुपमे आघे बह्रैना आपन परिकल्पना रहल बटैलै ।
उहे बिच नगरके पहिल बैठकसे महत्वपूर्ण तीन निर्णय करले बा । २०७२ भदौ ७ गते थरुहट थारुवान आन्दोलनके क्रममे टीकापुरमे हुइल घटनाहे राजनैतिक घटना रुपमे घोषना कैना निर्णय करले बा ।
संविधान लेखनके क्रममे टीकापुरमे थरुहट आन्दोलनकारी ओ प्रहरीबीच दोहोरो झडप होके ८ प्रहरीसहित १ नाबालकके ज्यान गैल रहे । घटना हुइल डुसर दिन सकारे कफ्र्यु जारी हुइल समयमे ८० से ढिउर थारु समुदायके घर, पसल, एफएम लगायतमे आजजनी हुइल रहे । उक्त घटनाके मुद्दामे सांसद रेशम चौधरीसहित नेता कार्यकर्ता आभिन जेल सजाय भोग्टी रहल बाटै ।
ओस्टहे उहे बैठकसे भजनी नगरपालिका वडा नं १ मे रहल प्राथमिक स्वास्थ्य केन्द्रहे सुविधा सम्पन्न १५ शैयाके अस्पतालके रुपमे स्तरोन्नती ओ एकीकृत सम्पत्ति मालपोत कर एवं टमान सिफारिस दस्तुरमे परिमार्जन कैके सहुलियत पूर्ण बनैना निर्णय करल बा ।
यहोर टीकापुरके नगरप्रमुख रामलाल डगौरा फेन टीकापुर नगरहे देशके नमूना शहके रुपमे विकास कैके नगरबासीनके सपना साकार पर्ना आपन मुख्य अभिारा रहल बटैले बाटै । उहाँ नगरके विकासके लाग भौतिक पूर्वाधार निर्माणके साथे विभेदके न्यूनीकरण, सुशासन प्रवद्र्धन, सामाजिक न्याय, सर्वसुलभ सेवा लगायत कृषि, पर्यटन, शिक्षा स्वास्थ्य क्षेत्रमे विशेष प्राथमिकतामे राखके आघे बह्रना बटैले बाटै ।
उहे बिच उहाँ पहिल बैठकके टीकापुर नगरपालिकाहे सीटी अफ ग्रीन ग्राडेनके रुपमे विकास कैना, शिक्षा क्षेत्रहे सर्वसुलभ, पहुँचयोग्य ओ गणस्तरीय रुपमे विकास कैना विशेष कार्यक्रम लागू कैना ओ नगरपालिका भिट्टर यातायात सञ्चालन तथा आवागमनहे प्रभावकारी बनाइक लाग चक्रपथ निर्माण लगायत निर्णय करल जनाइल बा ।
