जेष्ठ नागरिकहुकन ओपीडी जाँच निःशुल्क कैना
पहुरा समाचारदाता
धनगढी, १० जेठ । धनगढी उपमहानगरपालिका ७० बरस उप्परके जोष्ठ नागरिकहुकनके लाग ओपीडी जाँच निःशुल्क कैना निर्णय कैले बा ।
मंगरके रोज उपमहानगरपालिकामे बैठल बैठकसे नेपाल निजी अस्पताल संघके सहयोगमे धनगढीमे बसोवास कैना जेष्ठ नागरिकहुकनहे ओपीडी जाँच निःशुल्क कैना निर्णय करल हो । ओस्टेक रोग निदान सल्यक्रियामे १० प्रतिशत, वेड चार्जमे १० प्रतिशत छुट, औषधिमे ५ प्रतिशत सहुलियत डेना निर्णय करल कैगिल बा ।
औषधि उपचार परिचयपत्र धनगढी उपमहानगरपालिकासे व्यवस्थापन करके सम्बन्धित वडासे वितरण कैना जनागिल बा । उ सेवा प्रवाहके प्रत्येक सकारे १० बजेस दुपहर १ बजेसम समय तोकल बा ।
धनगढी उपमहानगरपालिकाके नगरप्रुमख गोपाल हमालके अध्यक्षतामे बैठल बैठकमे धनगढीमे रहल निजी स्वास्थ्य संस्था नवजीवन, निसर्ग, माया मेट्रो, नोभा, ओम आशा, कैलाली, सिपी अस्पतालके प्रतिनिधिहुकनके उपस्थिति रहल रहे ।
