बाढपीडित हप्ता दिनभिटरे राहत पैना
पहुरा समाचारदाता
धनगढी, १२ जेठ । गैल कुवाँर ३१ से कार्तिक २ सम बरसल बेमौसमी एवं अविरल बर्षाके कारण धानवाली पूर्ण क्षति व्यहोरल कैलालीके किसानहुकनहे पाँच दिनभिटर राहात वितरण कैडेना जिल्ला प्रशासन कार्यालय कैलाली आग्रह करले बा ।
बुधके रोज धनगढीमे बैठल जिल्ला विपत व्यवस्थापन समितिके बैठक तथा नवनिर्वाचित जनप्रतिनिधीहुकन बधाई कार्यक्रममे प्रमुख जिल्ला अधिकारी किरण थापा सम्बन्धित पालिकाहुकनहे पेश हुइल निवेदन ओ प्रमाणके आधारमे राहत वितरण कैना आग्रह करल हुइट ।
कैलाली जिल्लामे गैल कुवाँर ३१ से कार्तिक २ सम बरसल बेमौसमी एवं अविरल बर्षाके कारण ८३ हजार ३६५ किसान बाढसे पीडित हुइल रहिट । गृह मन्त्रालयसे बाढ पीडितहुकनके लाग पठाइल रकम दामासाही अनुसार वितरण कैना प्रमुख जिल्ला अधिकारी थापा बटैलै ।
वेमौसमी वर्षातके कारण वालीनालीमे हुइल क्षतिसे प्रभावित हुइल कृषकहुकनहे राहत स्वरुप नगद उपलब्ध करैना उद्देश्यसे गृह मन्त्रालयसे पहिल चरणमे रु. ७ करोड ओ दुसरा चरणमे रु. १४ करोड ९७ लाख करके रु. २१ करोड ९७ लाख राहत रकम प्राप्त हुइल प्रमुख जिल्ला अधिकारी बटैलै ।
उ राहत रकमहे गैल चैत २० गतेक बैठल जिल्ला विपद् व्यवस्थापन समितिके निर्णयानुसार साना किसानहे प्रति कठ्ठा रु. ३९५, मझौला किसानहे प्रति कट्टा रु. १२५ ओ भारी किसानहे प्रति कठ्ठा रु. ७५ के दरसे राहत उपलब्ध करैना कहल रहे ।
गृह मन्त्रालयसे प्राप्त उ रकम सक्कु स्थानीय तहमे जिल्ला प्रशासन कार्यालय कैलालीसे तोकल रकमके चेक उपलब्ध कराके कार्यविधि अनुसार सम्बन्धित किसानहुकनके बैंक खाता मार्फत वितरण कैना उहाँ बटैलै ।
पीडित निवेदकहुकनसे प्राप्त कागजातके अध्ययन करके जग्गाधनी प्रमाण ओ पेश हुइल निवेदनमे लिखल विवरण भिराके यकिन करके फरक नइपर्ना करके तोकल राहत रकम वितरण कैना ओ हिसाव फरफारक कैना प्रयोजनके लाग ओकर सक्कल भौचर सम्बन्धित स्थानीय तह जिल्ला प्रशासन कार्यालय कैलालीमे समयमे उपलब्ध करैना निर्णयफे हुइल बा ।
जिल्लाके टमान ठाउँमे घटल विपद्के घटना (बाढ, आगलागी ओ हावाहुरी) से प्रभावित हुइल २१ जनहनहे जिल्ला प्रशासन कार्यालयसे टमान मितिमे वितरण करल राहत वापतके रकम रु. तीन लाख सोह हजार ओ बैशाख ११ गते कैलारी गा.पा.–७ के विपतपुरमे हुइल आगलागीमे १४ जनहनहे २० हजार ओ ३४ जनहनहे १५ हजारके दरसे वितरण करल जम्मा रु ७ लाख ९० हजार करके जम्मा रु. ११ लाख ६ हजारहे समर्थन कैना कहल बा ।
विपत व्यवस्थापन न्यूनिकरण कैना अइना दिनमेफे यी समितिके बैठकसे पाछे समर्थन कैना करके विपद् पीडितहे स्वीकृत मापदण्ड भिटर रहिके राहत उपलब्ध करैना जिल्ला प्रशासन कार्यालय कैलालीहे कार्यादेश पेश स्थानीय तहहे अनुरोध करल बा ।
यी वर्षके मनसून पूर्वतयारी तथा प्रतिकार्य योजना, २०७९ ओ जिल्ला विपद् पूर्वतयारी तथा प्रतिकार्य योजना २०६८ हे अद्यावधिक कैना ओ सक्कु स्थानीय तहसे समेत अपन भुगोल ओ प्रकृति अनुसार बिपद् पूर्वतयारी तथा प्रतिकार्य योजना अद्यावधिक करके कार्यान्वय कैना बैठकसे निर्णय करले बा ।
यी वर्ष वर्षातसे हुई सेक्ना क्षति न्यूनिकरण कैना स्थलगत रुपमे अवलोकन तथा अनुगमन करके सम्भावित जोखिख स्थल पहिचान कैना देहाय वमोजिमक एक कार्यदल गठन कैना कहल बा ।
हावाहुरी ओ आगलागीसे हुइ सेक्ना नोक्सानीके पूर्वतयारी तथा प्रतिकार्य योजनाके लाग सक्कु स्थानीय तहहे अनुरोध कैनाके साथे दमकल रहल स्थानीय तह दमकलहे चालु अवस्थामे रख्ना प्रमुख जिल्ला अधिकारी थापा आग्रह करलै ।
भर्खर सम्पन्न स्थानीय तह निर्वाचन २०७९ से निर्वाचित हुइल जिल्ला स्थित सक्कु स्थानीय तहके नवनिर्वाचित जनप्रतिनिधीहुकनहे जिल्ला विपद् व्यवस्थापन समिति कैलालीमे स्वागत करके समितिके काम, कर्तव्य ओ अधिकारके वारेमे जानकारी कराइल रहे ।
कार्यक्रममे जानकी गाउँपालिकाके अध्यक्ष गणेश चौधरी गैल कुवाँर ३१ से कार्तिक २ सम बरसल बेमौसमी एवं अविरल बर्षाके कारण धानवाली पूर्ण क्षति व्यहोरल कैलालीके किसानहुकनके लाग आइल रकम काहे वितरण हुई नइसेकल कहटी जिज्ञासा राखल रहिट । जोशीपुर गाउँपालिकाके अध्यक्ष चित्रबहादुर चौधरी खेतीपतिके समय आइलागल मने रासायनिक मलके अभाव हुइल बटैलै ।
कार्यक्रममे कैलाली जिल्लाके १३ स्थानीय तहके प्रमुख, उपप्रमुख, विपत व्यवस्थापन समितिके पदाधिकारीहुकनके उपस्थिति रहल रहे ।
