गेटा मेडिकल कलेज सञ्चालनके माग
सडक पत्रकार सम्मेलनसे प्रधानमन्त्रीहे ज्ञापनपत्र बुझागिल
पहुरा समाचारदाता
धनगढी, १३ जेठ । कैलालीके गेटा मेडिकल कलेजमे यिहे वर्षसे विशेषज्ञ स्वास्थ्य सेवा तथा मेडिकल कलेज सञ्चालनके लाग चारुओरसे नागरिक दवाव सहितके आन्दोलन सुरु हुइल बा ।
यिहे जेठ १० गते राष्ट्रपति विद्या भण्डारी संघीय संसदमे प्रस्तुत करल नेपाल सरकारके आर्थिक बर्ष २०७९/०८० के नीति तथा कार्यक्रममे गेटा मेडिकल कले संचालनके लाग कौनो बाट उल्लेख नइकरलपाछे नागरिक दवाव सहितके आन्दोलन सुरु हुइल हो ।
नागरिक दबाव समुहसे जारी आन्दोलनमे विफेक रोज सकारे धनगढीके एलएन चोकमे एक घण्टा चक्का ओ हस्ताक्षर कार्यक्रम कैगिल नृप सुनार बटैलै । भौतिक संरचना निर्माण कार्य झण्डै ९० प्रतिशत पुरा हुसेकल अवस्थामे यी मेडिकल कलेज संचालन कैना ओर सरकारके ध्यान नइजाइटसम आन्दोलन जारी रहना उहाँ बटैलै ।
उहाँ कहलै, ‘विफेक रोज सकारे धनगढीके एलएन चोकमे एक घण्टा चक्का ओ हस्ताक्षर कार्यक्रम कैगिल । आन्दोलनके कार्यक्रम अन्र्तगत कैलालीके प्रमुख जिल्ला अधिकारीमार्फत प्रधानमन्त्री, स्वास्थ्यमन्त्री ओ अर्थमन्त्रीहे ज्ञापनपत्र बुझागिल बा ।’ दुई बुँदे ज्ञापनपत्रमे आर्थिक वर्ष २०७९/०८० भिटर विशेषज्ञ स्वास्थ्य सेवा संचालन सहित मेडिकल कलेज संचालनके भरपर्दो ओ विश्वासिलो व्यवस्था करे पर्ना, संघीय संसदके चालु अधिवेशनमे गेटा मेडिकल कलेजके कानूनी हैसियत स्पष्ट कैना नीतिगत व्यवस्था करे पर्ना माग राखल बा । नागरिक दबाव समुहसे साँझके धनगढीके एलएनचोकमे सडक पत्रकार सम्मेलनफे करले बा ।
पत्रकार सम्मेलनमे ओम विष्ट माग सुनुवाई नइहुइटसम आन्दोलन जारी रहना बटैलै ।
मुख्यमन्त्री भट्टहे ज्ञापन
कैलालीके गेटा मेडिकल सञ्चालनके माग कैटी सुदूरपश्चिम प्रदेशके मुख्यमन्त्रीहे ज्ञापनपत्र बुझाइल बा । बिफेक रोज गेटा मेडिकल सञ्चालनार्थ संघर्ष समिति अत्तरियासे मुख्यमन्त्री त्रिलोचन भट्टहे ज्ञापनपत्र बुझाइल हो ।
ज्ञापनपत्रमे तत्काल मेडिकल कलेज सञ्चालनमे लाने पर्ना, मेडिकल कलेजहे स्वास्थ्य विज्ञान प्रतिष्ठानके रुपमे आघे बह्राइ पर्र्ना, मेडिकल कलेज सञ्चालनके लाग आगामी आर्थिक बरसमे आवश्यक बजेट विनियोजन करे पर्र्ना लगायतके माग राखल बावै । सरकारसे नीति तथा कार्यक्रममे गेटा मेडिकल नैपारलपाछे स्थानीय आन्दोलित हुइल बटै ।
धनगढीके मेयर हमालहे ज्ञापनपत्र
निर्माणाधिन प्रस्तावित गेटा मेडिकल कलेज संचालनके माग करटी धनगढी उपमहानगरपालिकाके मेयर गोपाल हमालहे ज्ञापन पत्र बुझाइल बा ।
‘गेटा मेडिकल कलेज संचालानार्थ संघर्ष समिति अत्तरियासे ज्ञापन पत्र बुझाइल हो । ज्ञापन पत्र बुझ्टी हमाल आन्दोलनमे एक्यवद्धता जनैले बटै ।
ज्ञापन पत्रमे तत्काल मेडिकल कलेज संचालनमे नाने पर्ना्, मेडिकल कलेजहे स्वास्थ्य विज्ञान प्रतिष्ठानके रुपमे आघे बढाई पर्ना, मेडिकल कलेज संचालनके लाग आगामी आर्थिक बर्षमे आवश्यक बजेट विनियोजन करे पर्ना लगायतके माग
राखल बा ।
