सञ्चार क्षेत्रहे उचित सम्बोधनः मन्त्री डा. रावल
पहुरा समाचारदाता
धनगढी, १३ जेठ । सुदूरपश्चिम प्रदेशके आन्तरिक मामिला तथा कानुन मन्त्री डा. रणबहादुर रावल संञ्चार क्षेत्रके उचित सम्वोधन कैना बटैले बटै ।
अइना आर्थिक वर्ष २०७९/८० के नीति तथा कार्यक्रम सम्बन्धी मन्त्रालयमे आयोजित पत्रकारसंगके छलफल कार्यक्रममे मन्त्री रावल उ बाट बताइल रहिट ।
सुदूरपश्चिम प्रदेशके संचार माध्यम ओ पत्रकारहुकनके पेशागत संरक्षण कैना प्रत्यक्ष अनुभूती हुइना खालके कार्यक्रम नन्ना मन्त्री रावल बटैलै । आर्थिक वर्ष २०७९/८० के नीति तथा कार्यक्रममे मन्त्रालयसे का कैसिन योजना बनैना कना सम्बन्धमे पत्रकारहुकनसंग छलफलके आयोजना करल रहे ।
ओस्टेक फरक प्रसंगमे मन्त्री रावल सुदूरपश्चिममे प्राकृतिक प्रकोपके कारण विपतिके सिर्जना हुइना करल ओरसे यम्नेसमेत मन्त्रलाय विशेष योजना बनैना बटैलै ।
छलफलमे पत्रकार दिर्घराज उपाध्याय सुदूपश्चिम प्रदेशके संचारमाध्यमके लाग बैज्ञानिक बिज्ञापन नीति ओ पत्रकारके पेशा, आर्थिक सवलीकरण सुदृढ कैना खालके योजना नाने पर्ना सुझाव डेहल रहिट । कोरोना संक्रमणपाछे छोट लगानीके संञ्चार उद्योग संकटमे परल ओरसे मन्त्रालयसे अर्थिक अनुदान मार्फत संञ्चार उद्योगहे उचित सम्बोधन कैनाफे सहभागी पत्रकारहुक्रे सुझाव डेहल रहिट ।
