जनप्रतिनिधिहुकन बधाई तथा स्वागत कार्यक्रम
पहुरा समाचारदाता
पहलमानपुर, १४ जेठ । कैलालीके घोडाघोडी नगरपालिकाके नवनिर्वाचित जनप्रतिनिधिहुकन बधाई तथा स्वागत कार्यक्रम कैगिल बा ।
रानी झिरोख गाउँ समाज भल्मन्सा तथा गाउँ समाजके आयोजना ओ जनजागृति सामुदायिक वन उपभोक्ता समुह, बुलबुले सामुदायिक वन उपभोक्ता समुहके सहयोगमे नवनिर्वाचित जनप्रतिनीधिहुकन बधाई तथा स्वागत कार्यक्रम कैगिल हो ।
सुदूरपश्चिम प्रदेशसभा सदस्य अमर बहादुर साउदके वडका पहुनामे हुइल कार्यक्रममे उहाँ नवनिर्वाचित जनप्रतिनीधिहुकन बधाई तथा स्वागत करल रहिट । कार्यक्रममे बोल्टी उहाँ बुलबुले सामुदायिक वनभिटर रहल भुलभुलैयाहे पोखरी टलवा बनाइक लाग प्रदेश सरकारसे बजेट विनियोजना कैना प्रतिवद्धता जनैले बटै ।
घोडाघोडी नगरपालिकाके नगर प्रमुख खडक बहादुर रावत नगरके बजेट जनताके माग अनुसार कैना बटैलै । उपप्रमुख गुलियादेवी चौधरी नगरपालिकासे छुटयइना बजेटमे महिला उत्थानके कार्यक्रमहे विशेष जोड डेना बटैली ।
घोडाघोडी नगरपालिका–१० से निर्वाचित वडा अध्यक्ष विजयराज स्वाँर अपने अपने सेवा सुविधाके रकम अनाथ बालबालिका, एकल महिला, स्कुल जैनासे बन्चित बालबालिकाहे सहयोग कैना बटैलै ।
कार्यक्रममे रानी झिरोखा टोल समिति सदस्य टेकराज भण्डारी, बुलबुले सामुदायिक वनके अध्यक्ष खडक बहादुर बुढा, जनकल्याण माविके प्रअ मोति प्रसाद शर्मा, समाजसेवी चन्द्र बहादुर चौधरी लगायत बधाई तथा स्वागत करल रहिट । कार्यक्रमके संचालन शिक्षिका धर्मा भट्ट करले रहिट ।
