‘बजेटके पखाईमे बटी’
आन्दोलन स्थगित कैगिल बा, ओराइल नइहो गेटा मेडिकल कलेज वृहत नागरिक दवाब समूह
पहुरा समाचारदाता
धनगढी, १५ । गेटा मेडिकल कलेज वृहत नागरिक दवाब समूह आज (अँट्वारके रोज) प्रस्तुत हुइना संघीय बजेटमे गेटा मेडिकल कलेजहे नइसमेटलेसे आन्दोलन आउर कडा बनैना चेतावनी डेले बा ।
सुदूरपश्चिम प्रदेशके गौरव गोदावरी नगरपालिका–५ मे रहल गेटा मेडिकल कलेजहे तुरुन्त संचालनके माग करटी गेटा मेडिकल कलेज वृहत नागरिक दवाब समूह पाँच दिनसे धनगढी ओ अत्तरियामे विरोध कार्यक्रम करल रहे ।
समुहसे प्रधानमन्त्री, स्वास्थ्यमन्त्री, सुदूरपश्चिम प्रदेशके मुख्यमन्त्री, प्रमुख जिल्ला अधिकारी, नगरप्रमुखहुकन ज्ञापनपत्र बुझैनाके साथे हस्ताक्षर, सडक पत्रकार सम्मेलन करल वृहत नागरिक दवाब समूह बटैले बा ।
समूहके अगुवा नृपबहादुर सुनार आर्थिक वर्ष २०७९/०८० भिटरे विशेषज्ञ स्वास्थ्य सेवा संचालन सहित मेडिकल कलेज संचालनके भरपर्दो ओ विश्वासिलो व्यवस्था करे पर्ना, संघीय ससदके चालू अधिवेशनमे गेटा मेडिकल कलेज कानूनी हैसियत स्पष्ट कैना नीतिगत व्यवस्था करे पर्ना माग करल बटैलै ।
उहाँ कहलै, गेटा मेडिकल कलेजहे तुरुन्त संचालनके माग करटी चार दिनसे आन्दोलन कैगिल । आज प्रस्तुत हुइना संघीय बजेटमे गेटा मेडिकल कलेजहे सम्बोधन नइहुइलेसे फेरसे कडा आन्दोलन हुई ।’
यिहे गैल जेठ १० गते संघीय संसदमे प्रस्तुत हुइल नेपाल सरकारके आर्थिक बर्ष २०७९/०८० के नीति तथा कार्यक्रममे गेटा मेडिकल कलेज संचालनके लाग कौनो बाट उल्लेख नइहुइलपाछे कैलाली सहिट सुदूरपश्चिमबासी स्वस्फूर्त रुपमे नागरिक दवाब आन्दोलन सुरु करल रहिट ।
गेटा मेडिकल कलेजके भौतिक संरचना निर्माण कार्य झण्डै ९० प्रतिशत पुरा हुसेकल अवस्थामे कलेज संचालन कैना ओर सरकारके ध्यान नइहुइलप्रति गम्भीर चिन्ता ओ चासो व्यक्त करटी यकर संचालनके लाग नीतिगत तथा आवश्यक बजेटके व्यवस्था कैना कैलालीसहित सुदूरपश्चिमवासीके ओरसे आन्दोलन सुरु हुइल बा ।
उद्योगी व्यवसायीफे सडकमे कैलालीके गेटामे भौतिक संरचना निर्माण हुइल मेडिकल कलेज यिहे वर्षसे सञ्चालनके माग करटी पाँच दिनसे जारी सडक आन्दोलनमे कैलालीके उद्योगी व्यवसायीफे उटरल बटै ।
यिहे क्रममे कैलाली उद्योग वाणिज्य संघके आहवानमे शनिच्चरके सकारे धनगढीमे वृहत् विरोध प्रदर्शन तथा सभा हुइल बा ।
धनगढी ट्राफिक चौराहसे निकरल विरोध र्याली झण्डे डेढ किलोमिटर बजार परिक्रमा करके विरोध सभामे परिणत हुइल रहे ।
‘गेटा मेडिकल कलेजमे यिहे वर्षसे विशेषज्ञ स्वास्थ्य सेवा सञ्चालन करके मेडिकल कलेज सञ्चालनके प्रक्रिया आघे बढाउ’, ‘संघीय संसदके चालु अधिवेशनसे मेडिकल कलेजके कानुनी हैसियत स्पष्ट कैना आवश्यक विधेयक पारित कर,’ ‘सुदूरपश्चिमेली जनताके विशेषज्ञ स्वास्थ्य पैना अधिकार सुनिश्चित कर’, ‘सुलभ ओ सहज रुपमे चिकित्साशास्त्र अध्ययन कैना अधिकारके ग्यारेन्टी कर’ लगायतके पोष्टर छातीमे टाँसके सहभागीहुक्रे प्रदर्शन करले रहिट ।
विरोध ¥याली तथा सभामे उद्योगी, व्यवसायी, टमान राजनीतिक दलके प्रतिनिधि, शिक्षक, प्राध्यापक, बुद्धिजीवी, विद्यार्थी, कानून व्यवसायी, अधिकारकर्मी, सञ्चारकर्मी लगायतके सहभागिता रहल रहे ।
धनगढीके पार्कचोकमे हुइल विरोध सभामे काँग्रेस नेता गोविन्दराज जोशी, एमाले नेता रणबहादुर चन्द, माओवादी केन्द्रके नेतृ शान्ति अधिकारी, नेकपा विप्लवके नेता विमल धामी, नागरिक अगुवा रविनकान्त पन्त, कैलाली उद्योग वाणिज्य संघके महासचिव ओम विष्ट, पदम शाह लगायत गेटा मेडिकल कलेज सञ्चालनके लाग सरकारसे अइना वर्षके बजेटमे आवश्यक रकम विनियोजन कैनाके साथे संसदके चालू अधिवेशनसे आवश्यक विधेयक पारित कैना माग करलै ।
सहभागी वक्ताहुक्रे कहलै– अब्बे जनताके छोट हिस्सा केल सडकमे उटरल बा । यदि सरकारसे जनताके आवाज नइसुन्लेसे भर ओकरपाछे सिर्जना हुइना आन्दोलनके आँधीबेहरीके जिम्मेवारीफे सरकार हुई परी ।
ओस्टेक करके शनिच्चरके साँझ हुइल विरोध सभामे नेपाल पत्रकार महासंघ कैलालीके अध्यक्ष हिमालय जोशी, बार इकाई कैलालीके पूर्व अध्यक्ष प्रेम चन्द, कैलाली बहुमुखी क्याम्यसके पूर्व स्ववियू सभापति चुडामणि भट्ट, कैलाली उद्योग वाणिज्य संघके अध्यक्ष पुष्पराज कुवँर, कैलाली उद्योग वाणिज्य संघके महासचिव ओम विष्टलगायत मन्तव्य राखल रहिट । उहाँहुक्रे गेटा मेडिकल कलेजके लाग सरकार बजेट नइछुटइलेसे फेरसे आन्दोलन कडा बनैना बटैलै ।
