देह व्यापारमे संलग्न १५ जाने पक्राउ
पहुरा समाचारदाता
धनगढी, १५ जेठ । धनगढीके टमान होटलसे देह व्यापारमे संलग्न रहल होटल संचालक सहिट १५ जाने पक्राउ परल बटै । पक्राउ परल मे ७ पुरुष ओ ८ जाने महिला रहल जिल्ला प्रहरी कार्यालय कैलालीके प्रवक्ता वेद प्रकाश जोशी बटैलै ।
उहाँक अनुसार धनगढी उपमहानगरपालिका वडा नम्बर ३ चटकपुरमे संचालन करल पहाडजंग होटलसे एक जाने संचालक सहिट एक महिला करके दुई जाने, धनगढी–३ स्थित अपी होटलसे २ महिला, धनगढी–३ स्थित बसन्त होटलसे संचालक सहित २ पुरुष, २ महिला करके चार जाने, धनगढी–३ स्थित जोगबुढा होटलसे एक महिला, धनगढी–४ स्थित मालिका होटलसे संचालक सहिट दुई पुरुष एक महिला करके तीन जाने ओ धनगढी–२ स्थित रहल पिस प्वाइन्ट होटलसे संचालक सहिट एक महिला दुई पुरुष करके तीन जाने पक्राउ परल जिल्ला प्रहरी कार्यालय कैलालीके प्रवक्ता जोशी बटैलै ।
दिन डेहडे धनगढी बजारमे रहल होटलमे देह व्यापार हुइटी रहल कना विशेष सूचनाके आधारमे वडा प्रहरी कार्यालय धनगढी कैलालीसे प्रहरी निरिक्षकके कमाण्डमे खटल प्रहरी टोली धनगढी उपमहानगरपालिका बजार क्षेत्रमे रहल होटलमे छापा मारेबेर ओइनहे पक्राउ करल रहे । पक्राउ हुकनहे जिल्ला प्रहरी कार्यालय कैलालीमे नानके थप अनुसन्धान हुइटी रहल बा ।
