विकासके लाग सरकार ओ सञ्चार सहकार्य आवश्यक
पहुरा समाचारदाता
टीकापुर, १६ जेठ । टीकापुर नगरपालिकाके प्रमुख रामलाल डंगौरा थारु नगर विकासके जिम्मेवारी काँधमे आइल ओरसे सम्मान, स्वागत जैसिन कार्यक्रमममे नैअल्झाके, काम कैना अवसर प्रदान कैडेना नगरवासीहे आग्रह करले बाटै ।
नगरबासीके ढिउर समस्या समाधान करे पर्ना हुइल ओरसे आब कामके गतिहे आघे बह्रैना ओ सम्मान जैसिन कार्यक्रम कम कैना सुझाव डेलै । सामुदायिक रेडियो टीकापुर एफएमसे टीकापुर नगरपालिका ओ जानकी गाउँपालिकामे निर्वाचित जनप्रतिनिधिहे करल स्वागत तथा सम्मान कार्यक्रममे बोल्टी नगर प्रमुख थारु इहीसे आघे अपने कार्यपालिका सदस्य होके काम करल अनुभव रहल ओरसे नगर विकासके लाग अपने कौनो फेन कसर बाँकी नैरख्ना बटैलै ।
‘टीकापुरके विकासके लाग कही कतै नैचुकम’’, उहाँ कहलै, ‘टीकापुर विकासमे मिडियाके सुझाव सल्लाह लेके आघे बह्रब । हमार सकारात्मक काममे हौसला डेना, नकारात्मक कार्यमे रचनात्मक सुझाव डेना काम मिडियाके रहना आशा बा ।’’
जानकी गाउँपालिकाके अध्यक्ष गणेश चौधरी लोकतन्त्र मजा नैमजा मापन कैना आधार जहाँ मिडिया स्वतन्त्र, जनताके पक्षमा बा वहाँ लोकतन्त्र बलगर बा कना प्रमाणित हुइल बटैलै । ‘स्थानीय सरकार ओ सामुदायिक रेडियो कैसिक सहकार्य कैके लोकतन्त्र कैसिक बलगर बनाइ सेकजाइ कहिके काम करब’’, चौधरी कहलै, ‘‘लोकतन्त्र बलगर बनैना मिडियाके भूमिका अहम बा ।’’
टीकापुर नगरपालिका वडा नं. १ के वडाध्यक्ष मोहन विक जनप्रतिनिधि ढिउर चीज नैडेखल, नैबुझल ओरसे उ चीज डेखाडेना आग्रह करलै ।
कार्यक्रममे जनप्रतिनिधिहे स्वागत कैटी रेडियो सञ्चालक समितिके अध्यक्ष रंगप्रसाद अधिकारी जनप्रतिनिधिके कार्य जनतामाझ पुगैना कार्यमे मिडियाहे भरपुर सदुपयोग कैना आग्रह करलै । कार्यक्रम स्टेशन मेनेजर एकीन्द्र तिमिल्सिना सञ्चालन करल रहिट ।
