शिक्षक संघसे १० बुँदे माग सहिट जनप्रतिनिधिहुकन सम्मान तथा बधाई कार्यक्रम

नितिस्रोत शिक्षकहुकन गाउँपालिका शिक्षकमे नियुक्तीके माग

पहुरा समाचारदाता
हसुलिया, १७ जेठ । कैलारी गाउँपालिकामे निर्वाचित हुके आइल नवनिर्वाचित जनप्रतिनिधिहुकन नेपाल शिक्षक संघ स्थानीय कार्यसमिति कैलारीसे सोम्मारके रोज १० बुँदे माग सहिट सम्मान तथा बधाई कार्यक्रम करले बा ।

सम्मान तथा बधाई कार्यक्रममे संघके कैलारी अध्यक्ष मदन प्रसाद पौडेल शिक्षकहुकनके माग मुद्दा समेटल १० बुँदे ज्ञापनपत्र गाउँपालिका अध्यक्ष राजसमझ चौधरीहे बुझाइल रहिट । ज्ञापनपत्रमे सामुदयिक विद्यालयके निजी स्रोेत शिक्षकहुकनहे गाउँपालिका शिक्षकमे नियूक्ती करके उचित तलब तथा सेवा सुविधाके व्यवस्था करे पर्ना माग करल बा ।

विद्यालयके कार्यालय सहयोगी कर्मचारीहुकनहे स्थानीय तहसे उपलब्ध कराई पर्ना रकम हालसम्म उपलब्ध नइकराइल ओरसे उ रकम निकासको लाग पहल करे पर्ना, शिक्षकहुकनके सरुवा बढुवामे आर्थिक चलखेल प्रोत्साहन पाइल ओेरसे ओसिन कार्यहे निरुत्साहित करके शिक्षहहुकनहे पायक पर्ना ठाउँमे सरुवा हुई चाहलेसे सहज रुपमे काम सम्पन्न हुइना वातावरण सिर्जना करे पर्ना माग करल बा ।

सामुदायिक विद्यालयहे वालमैत्री बनैना सफा स्वच्छ आर्कषण केन्द्रके योजना सहित आर्कषक कार्ययोजना लागु कैना ओर पहल करे पर्ना, विद्यालय मर्जके नाममे अनावश्यक दवाब देके मर्ज कैना परिपाटी रहल ओरसे सामुदायिक विद्यालय धरासायी हुके इतिहासमे केल सीमित रहना हुइल ओरसे मर्ज कैनासेफे आर्कषक कार्यक्रम लागु करके विद्यार्थी भर्ना ओ टिकावके लाग पहल करे पर्ना माग करल बा ।

राहत शिक्षकके विरामी विदा सम्बन्धित निकायसे स्वीकृत करे पर्ना, गाउँपालिका अन्तरगत आन्तरिक सरुवा सम्बन्धमे पहल करे पर्ना, संघीय शिक्षक सिकाई अनुदानमे नियूक्त हुइल शिक्षकके पेशागत ग्यारेन्टी करे पर्ना, पेशागत तालिमके बारेमे अध्यवाधिक करके लागु करे पर्ना ओ विद्यालय कर्मचारी बालविकामे कार्यरत शिक्षक कर्मचारीके हालके तलव वृृद्धि नइहुइल ओरसे महंगीहे आधार मानके पालिकासे तलब वृद्धि कैना पहल करे पर्ना माग करल बा ।

सम्मान तथा बधाई कार्यक्रममे गाउँपालिका अध्यक्ष राजसमझ चौधरी नेपाल शिक्षक संघ स्थानीय कार्यसमितिसे उठाइल माग जयज रहल ओरसे अपन कार्यकालमे पुरा कैना प्रतिवद्धता जनैलै । उहाँ कहलै, मै फे शिक्षण पेशासे यहाँसम पुगल हुँ, मही शिक्षकके पीडा पत्ता बा । निजीहुक्रनहे अपन अपन तलब काटके डेगिल रहे ।’ चुनावी घोषणापत्रमेफे शिक्षकहुकनमे माग राखल ओरसे पाँच बरसभिटर ढेर माग सम्बोधन हुइना ओ शिक्षकहुक्रे दुःख नइपैना उहाँ बटैलै ।

कैलारी गाउँपालिका आब नगरपालिकाफे बने सेकी,’अध्यक्ष कहलै, ‘भौतिक पूर्वाधार पुगल मने बहुमुखी क्याम्पसभर नइरहल ओरसे अपन कार्यकार्यमे स्थापना कराके छोरम ।’ शिक्षा, स्वास्थ्य, कृषिहे विशेष प्राथमिकतामे रख्ना बटैटी करके दायर घटैना, आर्थिक अवस्था कम्जोर रहल ओ स्थानीयस्तरमे सुत्केरी हुइनइसेक्ना अवस्था रहलेसे निशुल्क एम्बुलेन्सके व्यवस्था कैना उहाँ बटैलै । साथे तीन महिना पोषण भत्ताके समेट व्यवस्था कैना गाउँपालिका अध्यक्ष राजसमझ बटैलै ।

कैलारी गाउँपालिका बाढके ढेर जोखिम रहल ओरसे डुबान पटानहे विशेष ध्यान डेना बटैलै । ओस्टेक करके कैलारी–७ विपतपुरमे आगलागीसे क्षति व्यहोरल परिवारके लाग सक्कु जे समन्वय करके सहयोग अध्यक्ष बटैलै ।

कैलारी गाउँपालिकाके उपाध्यक्ष भगवती कुमारी चौधरी शिक्षकहुकनके माग विस्तरे सम्बोधन करटी जैना बटैली । आघेक जनप्रतिनीधिहुकनके शिक्षकहुक्रे ढेर दुःख पाइल ओरसे कुहीहे पार्टीगत रुपमे हेरके विभेद कैना नइमजा रहल बटैली ।

नेपाली काँग्रेस महासमिति सदस्य पुरन प्रसाद चौधरी कैलारीमे बहुमुखी क्याम्पस स्थापनामे जोर डेहल रहिट । उहाँ कहलै, स्थानीय स्तरमे बहुमुखी क्याम्पस स्थापना हुइलेसे यहाँक विद्यार्थी अपने घर बैठके पह्रे सेक्ना बटैलै । कैलारीके टमान जैसिन विद्यालय जीर्ण अवस्थामे रहल ओरसे पठनपाठनमे समेट समस्या आइल उहाँ बटैलै ।

नेपाल शिक्षक संघ प्रदेश सदस्य मीना बोहरा आघेक निर्वाचित जनप्रतिनिधिहुकन व्यवहारप्रति सक्कुहुनहे दुःखित बनाइल बटैली । उहाँ कहली, विद्यालय अनुगमनके क्रममे विद्यार्थीनहे नइमजा व्यवहार हुइल रहे ।

शिक्षक नरबहादुर विष्ट अपने नेपाल शिक्षक संघमे अवद्ध हुइलक कारण पाँच बरस दुःख भोगे परल बटैलै । दिपेन्द्र माविके प्रअ विनोद भट्टराई कैलारीमे अब्बे शिक्षकहुकन काम कैना मजा वातावरण मिलल ओरसे शिक्षाके विकास कैके डेखैना समय आइल बटैलै ।

वडा नम्बर ७ वडा अध्यक्ष दिपेन्द्र बहादुर बम विद्यालयमे रहल समस्याहे मध्यनजर करके आघे बह्रना बटैलै । वडा नम्बर २ के वडा सदस्य टिका चौधरीभुल हसुलियामे बहुमुखी क्याम्पस स्थापना हुइलेसे आर्थिक अवस्था कम्जोर रहल विद्यार्थीफे अपन घरेक माड खाके पह्रना अवसर पैना बटैली ।

कार्यक्रम नेपाल शिक्षक संघ स्थानीय कार्यसमिति कैलारीके अध्यक्ष मदन प्रसाद पौडेलके अध्यक्षतामे हुइल रहे कलेसे संचालन संघके सदस्य खडक बहादुर तिरुवा करले रहिट । कार्यक्रममे गाउँपालिका अध्यक्ष, उपाध्यक्ष, वडा अध्यक्ष, कार्यपालिका सदस्य, वडा सदस्यहुकनहे खादा सहिट सम्मान कैगिल रहे ।