कैलारीके कार्यपालिका सदस्यहुकन सपथ ग्रहण

पहुरा समाचारदाता
हसुलिया, १७ जेठ । कैलालीके कैलारी गाउँपालिकामे कार्यपालिकासे पूर्णता पैले बा । गाउँपालिका अध्यक्ष राजसमझ चौधरी ओ उपाध्यक्ष भगवतीकमुारी चौधरी, ९ वडाके सहित १७ जानेक कार्यपालिका बनाइल बा ।

कार्यपालिका सदस्यमे वडा नम्बर १ के वडा अध्यक्ष धोजहरिपाल बोहारा, वडा नम्बर–२ के वडा अध्यक्ष विकास चौधरी, वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेम बहादुर चौधरी, वडा नम्बर ७ के वडा अध्यक्ष दिपेन्द्रबहादुर बम, वडा नम्बर ८ के वडा अध्यक्ष तारामल कठरिया ओ वडा नम्बर ९ के वडा अध्यक्ष खेमराज चौधरी रहल बटै ।

ओस्टेक निर्वाचन अधिकृतके कार्यालय कैलारीसे जनाइल अनुसार वडा नम्बर ६ से सुनिला चौधरी, वडा नम्बर ७ सुन्दरी चौधरी, वडा नम्बर २ से टीकाकुमारी चौधरी भुल, वडा नम्बर ९ से जगमा चौधरीहे चुन्ले बा । ओस्टेक वडा नम्बर ४ लालबहादुर विक वडा नम्बर ५ बाट मनिराम कुमालहे मनोनित कैगिल बा ।

स्थानीय कार्यपालिकामे महिला उम्मेदवारहुक्रे स्थानीय तहके निर्वाचन जिटके आइल मन्से छाने पर्ना व्यवस्था बा कलेसे दलित वा अल्पसंख्यकके उम्मेदवार भर बाहेरसे हुइना मने ओइने सम्बन्धित गाँउ वा नगरपालिकाका मतदाता भर हुई पर्ना प्रावधान बा ।

सोम्मार पालिकाके प्रमुख प्रशासकीय अधिकृत विरबहादुर ऐर ओ कैलारी गाउँपालिकाके निर्वाचन अधिकृत कृष्णप्रसाद नेपाल पालिका सदस्यहुकनहे सपथ खवैले रहिट । कैलारी गाउँपालिका १ से ९ वडामे नेपाली काँग्रेसके प्यानल विजयी हुइल ओरसे कार्यपालिका सदस्य छनौटमे कौनो समस्या नइआइल हो ।

ओस्टेक करके गोदावरी कार्यपालिकासे पूर्णता पैले बा । कार्यपालिकामे काँग्रेसके पूर्ण बहुमत रहल बा । कार्यपालिकामे मेयर उपमेयर सहित २२ जाने रहल बटै । मेयरमे काँग्रेसके ओरसे निर्वाचित वीरेन्द्र भट्ट सहित काँग्रेसके ८ जाने वडा अध्यक्ष रहल बटै ।

नयाँ जनप्रतिनिधि चुनल १५ दिनभिटर अपनेहुकन मन्से निर्वाचित महिला सदस्य ओ दलित तथा अल्पसंख्यक समुदायसे अलगे सदस्य छनोट करे पर्ना प्रावधान अनुसार ५ जाने महिला सदस्य ओ ३ जाने दलित सदस्य छनोट करलपाछे नगरपालिकाके कार्यपालिका पूर्णता पाइल हो ।

ओस्टेक, एमालेके ओरसे उपमेयर सहित ४ जाने वडा अध्यक्ष रहल बटै । । ओस्टेक, कार्यपालिकाके निर्वाचनसे काँग्रेसके इस्वरा नेपाली, बसन्ती देवी थरुनी, शारदादेवी भट्ट, डम्मरी शाहु ओ ईश्वरी रावल निर्वाचित हुइल बटै । काँग्रेससे महादेव कामी, चन्द्रा देवी भुल ओ धनी कामीफे कार्यपालिकामे निर्वाचित हुइल बटै । ओइने सोम्मार सपथ लेले बटै ।

निर्वाचन अधिकृतके कार्यालय कैलालीसे जनाइल अनुसार गोदावरीके ५ महिला सदस्य ओ ३ दलित सदस्य निर्विरोध चयन हुइल बटै । नगरपालिकामे नगरप्रमुखके अध्यक्षतामे नगर कार्यपालिका गठन हुइना प्रावधान रहल बा । जेम्ने उपप्रमुख, प्रत्येक वडासे निर्वाचित वडा अध्यक्ष, ५ जाने महिला सदस्य ओ दलित वा अल्पसंख्यक समुदायसे ३ जाने सदस्य रहठै । गोदावरीमे १२ ठो रहल ओरसे नगरप्रमुखके अध्यक्षतामे २२ सदस्यीय कार्यपालिका गठन हुइल हो ।