घोडाघोडीके कार्यपालिका पूर्णता पाइल

पहुरा समाचारदाता
सुखड, १८ जेठ । कैलालीके घोडाघोडी नगरपालिकामे नगरकार्यपालिका पूर्णता पैले बा । स्थानीय निर्वाचन सम्पन्न हुइल पाछे निर्वाचित महिला सदस्य मध्येसे ५ जाने ओ दलित वा अल्पसंख्यकसे ३ जाने सदस्य थपे पर्र्ना प्रावधान अनुसार कार्यपालिका पूर्णता पाइल निर्वाचन अधिकृतके कार्यालय जनैले बा ।

कार्यपालिका सदस्यके लाग उम्मेदवारी परल ८ जाने निर्विरोध चयन हुइल पाछे कार्यपालिका पूर्णता पाइल हो ।

कार्यपालिका सदस्यके लाग नेपाली कांग्रेससे निर्वाचित महिला सदस्य मध्ये गीता सुनार, विष्णादेवी डंगौरा, मीना कुमारी विक, एकीकृत समाजवादीसे भवीसरा भण्डारी ओ नेकपा माओवादी केन्द्रसे कमलाकुमारी विक चुनाराके उम्मेदवारी परल रहे ।

ओस्टके दलित वा अल्पसंख्यक मध्ये नेकपा माओवादी केन्द्रसे आकाश परियार, टेकेन्द्रबहादुर नेपाली ओ भक्तबहादुर विकके उम्मेदवारी परल रहे ।

मनोनयन दर्तामे ८ जाने उम्मेदवारके किल उम्मेदवारी परल ओरसे उहाँहुक्रे निर्विरोध रुपमे चयन हुइल निर्वाचन अधिकृत भानदेव जोशी जनाकारी डेलै । कार्यपालिका सदस्यहुक्रनहे बुधके निर्वाचन हुइल प्रमाणपत्र हस्तान्तरण सहित शपथ ग्रहण कराइल बा ।

इ संगे २२ सदस्यीय नगर कार्यपालिकामे नेपाली कांग्रेसके बहुमत रहल बा । नगर प्रमुख सहित कार्यपालिकामे एकीकृत समाजवादीके २ जाने, उपप्रमुखसहित नेपाली कांग्रेसके १३ जाने, माओवादी केन्द्रसे १ वडा अध्यक्षसहित ५ जाने, नेकपा एमाले ओ जनता समाजवादीसे १ वडाध्यक्ष रहल बाटै । गत स्थानीय तहके निर्वाचनमे इ नगरपालिकामे नेकपा एमालेके बहुमत रहल रहे ।