सुखड इलाका प्रहरी कार्यालयसे एक कैदी फरार

पहुरा समाचारदाता
धनगढी, १९ जेठ । इलाका प्रहरी कार्यालय सुखड कैलालीके एक थुनुवा कैदी हतकडी सहित फरार हुइल बा । जेठ १८ गते मेडिकलके लाग सुखडके घोडाघोडी अस्पतालसे अइना क्रममे घोडाघोडी २ साडेपानीके २४ वर्षीय कृष्ण पाण्डेय हतकडी सहित फरार हुइल बाटै ।

जेठ १४ जेठ घोडाघोडी २ साडेपानीके कृष्ण पाण्डेय ओ प्रकाश शाहहे लागुऔषधके मुद्दामे पक्राउ कैके थुनामे राखल रहे । डुनु जनहनहे मेडिकल जाँचके लाग स्थानीय घोडाघोडी अस्पताल लैगिल रहे । उहाँ अस्पतालसे अइना क्रममे फरार हुइल जिल्ला प्रहरी कार्यालयके प्रहरी नायव उपरीक्षक (डीएसपी) वेद जोशी जानकारी डेलै ।

डुनु जनहनहे जेठ १८ गते पेटके समस्या कहटी मेडिकलके लाग लैगिल रहे । डुनु जनहनहे म्याद थप कैके इलाका प्रहरी कार्यालय सुखडमे राखके थप अनुसन्धान हुइटी रहल रहे । अब्बे हुइल थुनुवाके खोजीके लाग जिल्ला ओ इलाकाके टोली खटल प्रहरी नायव उपरीक्षक जोशी जानकारी डेलै ।