टीकापुरके मेयर लेलै नगर विकास समितिके जिम्मेवारी

पहुरा समाचारदाता
टीकापुर, १९ जेठ । टीकापुर नगरपालिका प्रमुख रामलाल डगौंरा थारु बिफेक रोज टीकापुर नगर विकास समितिके जिम्मेवारी लेले बाटै ।

टीकापुर नगर विकास समितिमे हुइल पदभार ग्रहण तथा पदस्थापन कार्यक्रममे नगर प्रमुख एवम् टीकापुर नगर विकास समितिके अध्यक्ष समेत रहल थारु टीकापुरके टमान समस्या बारे अध्ययन कैके आघे बह्रना बटैलै ।

नगर प्रमुख तथा नगर विकास समितिके अध्यक्ष थारु हरियर टीकापुर, ग्रिन टीकापुर बनैना पहिल शुरुवात रहल फेन उ कार्यक्रममे बटाइल रहिट । टीकापुरके १ से ब्लक नं. ३२ समके सक्कु ब्लकमे सार्वजनिक जग्गामे आम, अमरुट, लिची, फुला लगैना नगरपालिकाके पहिल प्राथामिकता रहल थारु बटैलै ।

नगर प्रमुख थारु कहलै–‘टीकापुर औद्योगिक क्षेत्रके जग्गाके बिषयमे बिगतसे बात उठ्टी आइल बावै । औद्योगिक क्षेत्रके जग्गाके बिषयमे सक्कु जाने मिलके आघे बह्रलमे औद्योगिक क्षेत्रके जग्गाके समस्या समाधान कैना मै तत्पर रहल बाटुँ ।’
टीकापुरमे बह्रटी रहल लागुऔषधसे टीकापुरक्षेत्रके युवा दिनदिने कुलतमे फस्टी गैल ओरसे लागुऔषध दुव्र्यशनी नियन्त्रण कैना समेत सक्कु जाने गम्भिर हुइ पर्ना नगरप्रमुख थारु बटैलै ।

कार्यक्रममे इलाका प्रशासन कार्यालय टीकापुरके प्रमुख पुष्कर खड्का, टीकापुर नगरपालिकाके प्रमुख प्रशासकीय अधिकृत मंगल बहादुर शाही, लेखा अधिकृत लक्ष्मी ओड, एमालेके टीकापुर नगर अध्यक्ष धु्रबराज खत्री, नेपाली कांग्रेस प्रतिनिधी नरेश कुमार खत्री, पत्रकार पदम सापकोटा, झलनाथ खनाल लगायत आ आपन धारणा राखल रहिट ।