टीकापुर घटना राजनीतिक हो

पहुरा समाचारदाता
टीकापुर, १९ जेठ । कैलालीके जानकी गाउँपालिका गाउँ कार्यपालिकाके पहिल बैठकसे २०७२ सालके टीकापुर घटनाहे राजनीतिक घटना कहले बा ।

गाउँपालिकामे बिफेक सम्पन्न पहिल बैठकसे उक्त घटनाहे राजनीतिक घटनाके रुपमे बुझ्न बुझैना कहल हो । २०७२ भदौ ७ गते हुइल टीकापुर घटनामे ७ जाने सुरक्षाकर्मीसहित एक नाबालकके ज्यान गैल रहे । थरुहट थारुवान राज्यके माग कैटी प्रदर्शन करटी रहल बेला उक्त घटना घटल रहे ।

नागरिक उन्मुक्ति पार्टीसे गाउँपालिकाके अध्यक्षमे निर्वाचित हुइल गणेश चौधरी टीकापुर घटनाहे राजनीतिक घटनाके रुपमे सरकारसे नैलेहल ओरसे अपनेहुक्रे दबाव डेना उद्देश्यसे उक्त निर्णय करल बटैलै ।

‘थारु समुदायसे राजनीतिक मागसहित करल आन्दोलनके क्रममे हुइल घटना हो, इहीहे राजनीतिक रुपमे नै बुझे परल’ अध्यक्ष चौधरी कहलै‘आपन पहिचान सहितके राज्य माग कैटी हुइल घटनाहे सरकारसे राजनीतिक घटना कहले नैहो, हम्रे स्थानीय सरकारसे उक्त घटनाहे राजनीतिक घटना हो कहिके निर्णय करले बाटी ।’

थारु समुदायसे घरी घरी टीकापुर घटनाहे सरकार राजनीतिक घटनाके रुपमे लेहे पर्र्ना माग कैटी आइल बा ।‘थारु समुदायसे घरी घरी उ बात उठल बा’ अध्यक्ष चौधरी कहलै‘हमार करल निर्णयसे प्रदेश ओ संघीय सरकारहे समेत दबाव पुग्ना बा ।’
टीकापुर घटनाके मुख्य आरोपित कहल सांसद रेशमलाल चौधरीसहितके ७ जाने बन्दीहे रिहाई कैना कहटी टीकापुर घटनाहे राजनीतिक घटनाके रुपमे लेहे पर्ना मागसहित नागरिक उन्मुक्ति पार्टी चुनावी मैदानमे उत्रल रहे । उक्त मुद्दाहे खारेज करे पर्ना उहाँहुक्रे माग कैटी आइल बाटै ।

नागरिक उन्मुक्तिसे जानकीसहित जोशीपुर गाउँपालिका, टीकापुर ओ भजनी नगरपालिकामे जित्ले बा । इहीसे आघे भजनी नगरपालिका समेत टीकापुर घटनाहे राजनीतिक घटना कहटी निर्णय करले रहे ।

इहे घटना ओ थारु समुदायके पहिचानके माग कैटी सांसद चौधरीके गोसिनीया रञ्जिता श्रेष्ठ चौधरीके अध्यक्षतामे झण्डे चार महिना आघे नागरिक उन्मुक्ति पार्टी दर्ता हुइल रहे ।

ओस्टके कार्यपालिकासे परोसी गाउँ तथा नगरपालिकासँगके सहकार्यमे सामुदायिक पशुचौपायाके व्यवस्थापन कैना निणर्य करले बा । गाउँपालिके अध्यक्ष चौधरी कहलै‘इ समस्या सबके ओस्टहे हो, सक्कु जनहनसे सहकार्य कैके यकर दीगो व्यवस्थापन कैसिक करे सेकजाइ कहिके सहकार्य कैना निणर्य करले बाटी ।’ उहाँ गाउँ सभा असार ७ ओ ८ गते कैना निर्णय समेत करल बटैलै ।