टेंढी सिंचाई योजनासे कैलारीके नवनिर्वाचित जनप्रतिनिधिहे बधाई तथा स्वागत

पहुरा समाचारदाता
हसुलिया, २० जेठ । टेंढी सिंचाई जल उपभोक्ता समिति कैलालीके कैलारी गाउँपालिकाके नवनिर्वाचित जनप्रतिनिधिहुकनहे बधाई तथा स्वागत कार्यक्रम करले बा । समिति शुके रोज एक कार्यक्रमके आयोजना कैके कैलारीके नवनिर्वाचित जनप्रतिनिधिहुकनहे बधाई तथा स्वागत कार्यक्रम करल हो ।

गाउँपालिका अध्यक्ष राजसमझ चौधरीके प्रमुख आतिथ्यमे हुइल कार्यक्रममे विशिष्ट अतिथि गाउँपालिका उपाध्यक्ष भगवतीकुमारी चौधरी रहैं । कार्यक्रममे गाउँपालिका अध्यक्ष चौधरी बाढपीडित क्षेत्र सुधार करना टेंढी बाँधके विकास करेक लाग दत्तचित होके काम करना बटैलैं ।

उहाँ कलैं, “टेंढी बाँध सुरु हुइल समयमे मै अप्नही सुपरभाइजरके रुपमे काम करले रहुँ । यकर विकास योजनाके लाग निरन्तर लग्ना ओ २६ गाउँके किसान लाग अति उपयुक्त रहल बा ।” ओस्टेक, गुरही सिंचाई बाँधके लाग फेन उहाँ पहल करना बटैलैं ।

कार्यक्रममे समितिके उपाध्यक्ष बसन्त चौधरी, सिंचाई समितिके सचिव रमेश घिमिरे लगायत मन्तव्य व्यक्त करले रहैं । समितिके अध्यक्ष आमकारसिंह महतोके अध्यक्षतामे हुइल कार्यक्रममे कैलारी गाउँपालिका वडा नम्बर १ से लेके ९ समके वडाध्यक्ष, वडा सदस्य, समितिके सल्लाहकार संयोजक होमबहादुर गुरुङलगायत २६ गाउँके भल्मन्साहुकनके उपस्थिति रहल गाउँपालिकाका प्रवक्ता दीपेन्द्रबहादुर बम बटैलैं ।

कार्यक्रमके सञ्चालन नेपाली काँग्रेस कैलारी सभापति तथा बर्का मुडा गाउँक भल्मन्सा कृष्णप्रसाद चौधरी करले रहैं ।