कैलारीसे आगलागी पीडित विपतपुर बस्तीमे निःशुल्क विद्युत मिटर डेना

पहुरा समाचारदाता
हसुलिया, २१ जेठ । कैलाली गाउँपालिकासे आगलागि पीडित वडा नम्बर ७ विपतपुर मुक्तकमैयाहुकनहे निःशुल्क विद्युत मिटर डेना निर्णय करले बा ।

गाउँपालिकाके प्रवक्ता बम कहलै, ‘आगलागिसे बेघर हुइल मुक्तकमैयनके घर संगे विद्युत मिटरफे जरल बा । अब्बे ओइनके आर्थिक अवस्था एकदम कम्जोर हुइलक कारण कार्यपालिकाके बैठक गाउँपालिकासे पीडित परिवारहे विद्युत मिटर डेना निर्णय करल बा ।’
ओस्टेक करके कैलारी गाउँपालिका वडा नम्बर ५ पवेरा बजारमे हुलाकी सडकसे गुर्गी सिचाई आयोजनाके कुलुवामे कल्भर्ट निर्माण हुइना ठाउँमे पुल निर्माण करेबेर पुलके संरचनाके कारण कैलारी गाउँपालिकाके प्रमुख बजारके रुपमे रहल पवेरा डुवान ओ विस्थापित हुइना अवस्थामे बा । कैलारी गाउँपालिका एक पालिका एक अस्पताल (१५ शैया अस्पताल) निर्माणके लाग प्रक्रिया आघे बढसेकल बा ।

पुलके संरचनासे अस्पताल आवत जावतमे समेत समस्या सृजना हुइना ओरसे पवेरा बजारके उचित व्यवस्थापनके साथे १५ शैयाके अस्पतालसम सर्वसुलभ रुपमे आवातजावत करेक लाग आवश्यकताके आधारमे विकासके प्रक्रियाके कार्यान्वयनके लाग हुलाकी सडक आयोजना कार्यान्वयन इकाई तथा संघीय सरकारके सरोकारवाला निकायमे समन्वय तथा अनुरोध कैना निर्णय हुइल बा ।

बर्षातके आगमनसंगे कैलारी गाउँपालिकामे रहल अधिकाँश धुले तथा सडकमे यातायातके साधान डगर विगरके आवत जावत कैना कर्रा हुइना ओरसे डगरके बर्षायाममे नियमित मर्मत सम्भार करेक लाग ग्राभेल स्टक करके आवश्यकता अनुसार मर्मत सम्भारके कार्य कैना निर्णयफे हुइल प्रवक्ता बम बटैलै ।

कैलारी गाउँपालिका वडा नम्बर ६ ओ ४ जोरना घुरहा लडियामे निर्माण करल पक्की पुलके पूर्व उत्तर दक्षिण ओरके भागके माटी बाढसे पुहाके पुलसे आवतजावत कैना समेत कठिनाई हुइनाके साथे तत्काल पुलके मर्मत सम्भार नइकरले पुलके संरचना समेत ध्वस्त हुइना ओरसे उ पुलके मर्मत सम्भारके लाग सम्बन्धित निकायमे अनुरोध तथा समन्वय कैना निर्णय हुइल प्रवक्ता बटैलै ।