अपने पैना सेवा सुविधा मन्से छात्रवृति अक्षयकोष स्थापना करमः अध्यक्ष राजसमझ

जनकल्याणसे नवनिर्वाचित जनप्रतिनिधिहुकन बधाई ओ स्वागत कार्यक्रम
पहुरा समाचारदाता
धनगढी,२१ जेठ । कैलारी गाउँपालिकाके अध्यक्ष राजसमझ चौधरी जनकल्याण मावि के गाउँ मे अपने पैना सेवा सुविधा मन्से मन्से छात्रवृति अक्षयकोष स्थापना कैना घोषणा करले बटै ।

शुकके रोज कैलारी गाउँपालिका वडा नम्बर ४ मे रहल जनकल्याण माविसे आयोजना करल नवनिर्वाचित जनप्रतिनिधिहुकन बधाई ओ स्वागत कार्यक्रमके वडका पहुना रहल गाउँपालिका अध्यक्ष उ घोषणा करल हुइट ।
उहाँ कहलै, यी विद्यालयके आर्थिक स्रोत शुन्य रहल बा । यहाँ अध्ययन कैना जेहेन्दार विद्यार्थीनहे प्रोत्साहन मिले कना उद्देश्यसे अपने पैना सेवा सुविधा मन्से प्रत्येक बरष एक÷एक लाख दरटी जैम ।’ उ कोषमे प्रत्येक बरष एक÷एक लाख जमा हुइलेसे पाँच बरसमे पाँच लाख हुइना उहाँ बटैलै ।

कैलारी गाउँपालिकाके आघेक जनप्रतिनिधि ग्राहपूर्वग्राहके रुपमे काम करल अध्यक्ष आरोप लगैलै । उहाँ कहलै, ‘सक्कु विद्यालयमे स्थानीय शिक्षक भर्ना कैगिल । मने कौनो कौनो विद्यालयमे ग्राहपूर्वग्राहफे डेखगिल । जनकल्याण मावि के गाउँके अवस्था आउर विद्यालयके तुलनामे दयानिय बा । यी विद्यालय १० कटठामे सिमित रहल बा ।’
यी विद्यालयमे कैना सहयोगमे कैनो कमी नइरख्ना, जिर्ण अवस्थामे रहल भवनके मर्मत कैना, अधुरो भवनफे पूर्णता पैना उहाँ प्रतिवद्धता जनैलै ।

उहाँ कहलै, ‘शिक्षासंगे सक्कु क्षेत्रमे परिवर्तन करे पर्ना बा । हम्रे जनमुखी काम करेक लाग कदम चाल सेकल बटी । यहाँके जनतनके माग अनुसार भल्मन्सनहे कदर करटी जौन यहाँ कर ढेर लेजाइटा कना जनगुनासो आइल रहे । यी जनगुनासोहेफे पहिल बैठकसे सम्बोधन करसेकल बा । कैलारी गाउँपालिकामे मालमोत भूमिकरमे ५० प्रतिशत छुट कैना निर्णय कसेकल बटी ।’

समयमे जलम दर्ता करिट कहटी ३५ दिनमे जलम दर्ता करुइययामे दुई पोका आयोनुन ओ तीन पीस साबुन डेना निर्णय हुइल बा । यी हाली जलम दर्ता करिट कहिके प्रोत्साहन केल हो । सावन ठेनसे लागु हुइना करके सुत्केरी भत्ताफे डेजैना गाउँपालिका अध्यक्ष राजसमझ चौधरी बटैलै ।
चुनावी घोषणपत्रमे उल्लेख हुइल अनुसार नीजि शिक्षक, कर्मचारी, बालविकास ओइनसे बैठके ओइनके
माग सम्बोधन कैना प्रतिवद्धता जनाइटु उहाँ कहलै ।

विद्यालयके प्रअ हनुमान चौधरी विद्यालयके अवस्था दयानिय रहल बटैलै । उहाँ कहलै, टिनसे छाइल भवन चुहनाहा हुइल बा, और भवन जिर्ण हुके जोखिममे विद्यार्थीन पह्राई परठ । भवन बनैलक ढेर ऋण विद्यालयसे तिरे नइसेक्गिल हो ।’ आघेक जनप्रतिनिधिहुकन टमान चो ज्ञापनपत्र जानकारी करैलेसे वास्ता नइकरल उहाँ बटैलै ।

विद्यालय व्यवस्थापन समिति सदस्य फलिराम चौधरी गाउँपालिकासे ३५ लाखके भवन बनैना सम्झौता करके २६ लाख केल निकास करेबेर विद्यालयके नाउँमे सात लाख रुप्या ऋण लागल बटैलै । उहाँ कहलै, आघेक जनप्रतिनिधिके पालामे पहिले चार कोठाके ३५ लाख बनैना सम्झौता करल । पाछे दुई तल्ला बनाइबेर तरेक तल्ला फिनिसिङ हुइल ओ उप्पर लेन्टरसम केल हुइल बा । उप्परके तल्ला अधुरे बा । सम्झौता अनुसार रकम निकास नइहुइल कारण ठेकदार ओ समान नन्नलक सात लाख रुप्या तिर्ना बाँकी बा ।’

अभिभावक संघके सदस्य टेक बहादुर नेपाली २०४५ सालमे स्थापना हुइल यी विद्यालयमे कक्षा १० पह्राई हुइना मने अनुमति नइपाइल ओरसे उ अनुमति संगे कक्षा १२ सम संचालनके लाग गाउँपालिकाहे सहयोग कैना आग्रह करलैं ।
शिक्षक कृष्णदत्त जोशी सामुदायिक विद्यालयमे अध्ययन कैना बालबालिकाहे बोडिङ पह्रना विद्यार्थी सरह ध्यान डैदेना आग्रह करलै ।

शिक्षक जगत बहादुर शाही गाउँपालिकाहे शिक्षा, स्वास्थ्य, कृषि क्षेत्रहे नमूना बनैटी विद्यालयमे महिनामे एक दिन अनुगमन कार्यक्रम करे पर्ना जरुरी रहल बटैलै ।

नवनिर्वाचित जनप्रतिनिधिहुकन बधाई ओ स्वागत कार्यक्रममे गाउँपालिका उपाध्यक्ष भगवतीकुमारी चौधरी पानसमे वत्ती बारके ओ गाउँपालिका अध्यक्ष राजसमझ चौधरी व्यानर खोल्टी बचन करके उदघाटन करल रहिट । कार्यक्रमके संचालन विद्यालयके शिक्षक वृक्षलाल चौधरी करले रहिट । कार्यक्रममे विद्यार्थीनसे स्वागत गित, चेतनामुलक सामुहिक कविता बाचन, ओ झुम्रा नाँच डेखागिल रहे ।

विद्यालयसे १२ बुँदे मागसहित ज्ञापनपत्र
कैलारी गाउँपालिका अध्यक्ष राजसमझ चौधरीहे बुझाइल ज्ञापनपत्रमे कक्षा ६ से १० सम विद्यालय स्वीकृतिके लाग आवश्यक पहल करे पर्ना, प्रविधि तथा आई.सि.टी. व्यवस्थापन, नि.मा.बि. ओ मा.वि. मे २÷२ जाने स्थायी÷अस्थायी दरबन्दीके व्यवस्थापनके पहल कैना, सामावेशिता पर्ना करके गा.पा. से दलित शिक्षकके व्यवस्थापन, ४ कोठे नयाँ भवन निर्माणमे पहल करे पर्ना माग करल बा ।

२ ठो ट्रस भवन ओ २ कोठे ३ ठो पक्कि भवन लेन्टर मर्मत करे पर्ना, गरिब, जेहेन्दार, अपाङता, टुहुरा तथा विस्थापित छात्रा छात्रके लाग छात्रवृत्तिके व्यवस्था करे पर्ना, बाल उद्यान निर्माण, खेलकूद तथा शैक्षिक सामाग्री खरिद करे पर्ना, विज्ञान प्रयोगशाला तथा पुस्तकालयमे अप पुस्तक तथा सामाग्री खरिद करे पर्ना, शुद्ध खानेपानी तथा टुटी सहितके धारा निर्माण करे पर्ना, साईकल ÷ मोटर साईकल पार्किङ, डस्टविन तथा फोहोर व्यवस्थापन करे पर्ना ओ विद्यालयके मातहतमे रहल जग्गा घेरवारके निमित्त आवश्यक सामाग्री उपलब्ध कराई मागसहिटको ज्ञापनपत्र विद्यालयके प्रअ हनुमान चौधरी चौधरी गाउँपालिका अध्यक्ष राजसमझ चौधरीहे बुझाइल रहिट ।