भल्मन्साहुक्रे अपन वडाके योजना पालिकामे बुझैना

पहुरा समाचारदाता
धनगढी, २१ जेठ । धनगढी उपमहानगरपालिकाके १ से १९ वडाके भल्मन्साहुक्रे अपन वडाके योजना पालिकामे बुझैना बटैले बटै ।

शनिच्चरके रोज धनगढीमे नगरस्तरीय भल्मन्सा तर्दथ समितिके आयोजनामे बैठकमे योजनाबारे छलफल करटी अपन वडाके योजना कार्यपालिकामे बुझैना समितिके सचिव रोहितकुमार चौधरी बटैलै । धनगढी उपमहानगरपालिकाके १ से १९ वडासमके भल्मन्साहुक्रे सहभागितामे हुइल कार्यक्रममे उहाँ योजनाके माग, छनौट प्रक्रियाबारे छलफल करैले रहिट ।

उहाँ कहलै, वडा स्तरसे आइल योजनाहे कार्यपालिकामे पुगाजाई । छोट–छोट योजना वडा स्तरीसे ओ भारी योजना स्थानीय तह, प्रदेश हुइटी संघीय सरकारसम पहल कैजाई । संघीयता लागु हुइना आघे योजना छनौट करेबेर भल्मनसाहुकन छलफल करेसेफे अब्बे भर वेवास्ता करल उहाँ बटैलै ।

थारु बुद्धिजिवी बुन्दिलाल चौधरी थारु समुदायके देउथान बनाइबेर एकरुपता अइना जरुरी रहल बटै । कार्यक्रममे भल्मन्साहुक्रे आब संगठित हुके जैना जरुरी रहल बटैलै ।

धनगढीमे नगरस्तरीय भल्मन्सा तर्दथ समितिके संयोजक सरोज चौधरीके अध्यक्षतामे हुइल कार्यक्रममे उहाँ भल्मन्साहुक्रे मरणीकरणी केल नाही आब अपन अगुवाई अपनही करे जरुरी रहल बटैलै । उहाँ कहलै, भल्मन्साहुक्रे शक्तिशाली बटै ।

भल्मन्साहुक्रे चाहलेसे विकासके विगुलफे फुके सेक्ठै । समाजमे हुइना नइमजा कुरिता हटैना भल्मन्साहुकनके भारी योगदान बा ।’ ओस्टेक करके नगरस्तरीय भल्मन्सा तर्दथ समितिके यिहे जेठ २४ गते बेलीमे बैठना बैठकसे पूर्ण समिति बनैना तर्दथ समिति जनैले बा ।