सामाजिक अभियन्ता राजेन्द्र रैकाहे युवा प्रतिभा राष्ट्रिय सम्मान

पहुरा समाचारदाता
धनगढी, २२ जेठ । कैलालीके सक्रिय सामाजिक अभियन्ता एंव अधिकारकर्मी राजेन्द्र रैका यि वर्षके युवा प्रतिभा राष्ट्रिय सम्मानसे सम्मानित हुइल बटैं ।

बिगत दुई दशकसे मानवअधिकार सामाजिक न्याय ओ युवा सशक्तीकरण, दलित, सीमान्तकृत समुदायके हकअधिकार एंव रुपान्तरणके क्षेत्रमे योगदान पुगाइल कटि कैलाली जनपुस्तकालय अपन ६५ औं वार्षिकोत्सवके अवसरमे रैकाहे राष्ट्रिय सम्मान प्रदान करल हो ।

शनिच्चरके रोज एक समारोहमे सुदूरपश्चिम प्रदेश प्रमुख देवराज जोशी माला, दोसल्ला सम्मानपत्रसहित युवा प्रतिभा राष्ट्रिय सम्मान–२०७८ से सम्मान करले रहैं ।

सम्मान प्राप्त करटि अधिकारकर्मी रैका यि महत्वपूर्ण सम्मानसे अपनहे थप उर्जा ओ जिम्मेवारी बोध कराइल बटैलैं । समारोह अन्य टमान विधाके श्रष्टाहुकनहे समेत सम्मान करल रहे ।