ठाकुर कुस्मीनके गोटियार सम्मेलन उसरल
सागर कुस्मी
धनगढी, २२ जेठ । अपन भासा, संस्कृति, साहित्य संरक्षण संवर्द्धनके लाग कैलालीमे बसोबास रहल ठाकुर कुस्मी थारुनके गोटियार सम्मेलन उसरल बा ।
हरेक साल हुइना ठाकुर कुस्मी थारु सम्मेलन इ साल गौरीगंगा नगरपालिका वडा नम्बर ११ ऐंठा गाउँमे इहे १४ औं भाग शनिच्चरके रोज उसरल बा । अपन भासा, संस्कृति, साहित्य, परम्परा, रीतिरिवाज संरक्षण ओ संवर्द्धन कैना उद्देश्यसे हरेक साल सम्मेलन हुइटि आइल बा ।
गैल २ बरस कोरोना माहामारीसे रुकल सम्मेलन इ साल पहिलेकसे परिमार्जित कैके कार्यक्रम हुइल ठाकुर कुस्मी गोटियार समाजके अध्यक्ष खुशीराम चौधरी बटैलैं ।
“हम्रे हरेक साल हमार कुस्मी थारु गोटियारीनके सल्लाहसे सम्मेलन निप्टैली,” उहाँ कहलैं, “एक घरसे एक सदस्यके हिसाबसे हरेक साल २ हजार लेबी उठैटी आइल बटि ।” उठल लेबीसे अपने गोटियार भित्रे सहुलियत दरमे ऋण डेटि आइल उहाँ बटैलैं ।
स्थापना कालसे ठाकुर कुस्मी थारु लोग अपने गोटियार भित्रे टमान कार्यक्रम कर्टी आइल बा । भोज बियाह, मर्निकर्नी लगायत टमान सामाजिक कामके लाग ठाकुर कुस्मी थारुनके एकता, सद्भाव ओ मजा सम्बन्ध रहल बटिन ।
समाजके सचिव बलराम चौधरी कहलैं, गोटियार सम्मेलन कैके अब्बे हमार गोटियार ढेर जागरुक ओ सचेत हुइल बटैलैं । जिहिसे लावा पिढीके पुस्टा फेन थारु संस्कृति बारेमे हरेक जानकार हुइटी रहल उहाँ बटैलैं ।
अइना दिनमे नुकल छुपल गोटियारीनके खोजी कैना समाजके सहसचिव सागर कुस्मी बटैलैं । उहाँ कहलैं, ठाकुर कुस्मी गोटियारिनके सक्कु तथ्यांक ढारे पर्ना जोर लगैलैं । अइना दिनमे चालचलन, रीतिरिवाज, मर्नीकर्नीके बारेमफें लिखित रुपमे दस्तावेज कैना ओ समुहहे विधिवत रुपमे दर्ता कैके आघे बर्हना बटैलैं ।
लोप हुइटी रहल ठाकुर कुस्मी थारुनके डेउडुर्गा, रीतभाँठ, चालचलनके बारेमे लिखित रुपमे दस्तावेज कैना कोषाध्यक्ष हरिप्रसाद चौधरी बटैलैं । कोरोनाके महामारीसे प्रभावित हुइलेक ओर्से लगानी करल रकमके किस्ता किस्तामे बुझाइ पर्ना उहाँ बटैलैं ।
२०६६ सालसे फागुन २९ गतेसे लगातार सम्मेलन हुइटी आइल २०७७/०७८ सालमे कोरोनाके कारण स्थगित हुइल सम्मेलन इ साल भव्य ओ सभ्य रुपमे कार्यक्रम लौसारल उहाँ बटैलैं । कैलाली जिल्लामे डख्खिन टेंर्ही, ऐंठा, मन्कापुर, शिवपुर, बर्हैपुर, उदासीपुर, राजीपुर, अम्बासा, लालबोझी गाउँ ओ कञ्चनपुरके नौखरी गाउँमे ठाकुर कुस्मीनके बसोबास रहल बटिन ।
इहिसे पहिले रामनाथ चौधरी, छेदुराम चौधरी अध्यक्ष होके इ समाजहे हाँक सेक्ले बटैं कलेसे अब्बे खुशीराम चौधरी हँकटी बटैं । इहे सम्मेलनसे लावा कार्यसमिति फेन चयन हुइल बा । अब्बे लावा कार्यसमितिमे अध्यक्ष खुशीराम चौधरी, उपाध्यक्ष अञ्जु चौधरी, सचिव बलराम चौधरी, सहसचिव सागर कुस्मी, कोषाध्यक्ष हरिप्रसाद चौधरी, सदस्य सियाराम चौधरी, सन्तराम चौधरी, रूपमनी चौधरी, रामऔतार चौधरी ओ दुतराम चौधरी चयन हुइल बटैं । सम्मेलन ऐंठा, मन्कापुर ओ टेंर्ही गाउँमे पालिकपाला हुइटी आइल बा ।
कुछ बरस पहिले कैलालीमे टमान थर रहल थारुनके गोटियार सम्मेलन हुइटी गैल रहे । मने अझकल बहुत थारुनके गोटियार सम्मेलन बन्द होसेकल बा । समूह दर्ता नैरना, बचत कोष नैरना हुइलेक ओर्से फेन कैयो थारुनके गोटियार सम्मेलन भुट्भुटा सेकल बटिन ।
पुर्बी ठाकुर कुस्मी थारुनके भर अभिन सम निमयित सम्मेलन हुइटी रहल कैलाली कंचनपुरमे पुर्बी ठाकुर कुस्मी समाजके सल्लाहकार प्रेमबहादुर चौधरी बटैलैं । उहाँ कहलैँ, हमार गोटियारीनके अभिनसम नियमित सम्मेलन ओ बचत कोषमे रकम उठटी रहल उहाँ बटैलैं ।
अब्बेक समयमे सक्कु थारु ओइने अपन अपन भासा, कला, संस्कृति, संरक्षण ओ संवर्द्धन कैना जरुरी बिल्गाइठ ।
