जसपा नेपालसे नवनिर्वाचित जनप्रतिनिधिहुकन स्वागत ओ बधाई कार्यक्रम

पहुरा समाचारदाता
धनगढी, २२ जेठ । जनता समाजवादी पार्टी नेपाल अपन पार्टीसे निर्वाचित जनप्रतिनिधिहुकनके शनिच्चरके रोज धनगढीमे स्वागत ओ बधाई कार्यक्रम करले बा । जनता समाजवादी पार्टीसे कैलालीमे दुई जाने वडा अध्यक्ष ओ ७ जाने सदस्य निर्वाचित हुइल रहिट ।

यिहे गैल बैशाख ३० गते सम्पन्न हुइल निर्वाचनमे कैलालीमे उ पार्टीसे घोडाघोडी नगरपालिका वडा नम्बर ११ के वडा अध्यक्षमे दानसिंह जोगी ओ जोशीपुर गाउँपालिका–२ के वडाध्यक्षमे विष्णु चौधरी निर्वाचित हुइल रहिट । ओस्टेक करके वडा सदस्यहुकनमे पार्वती कठरिया घोडाघोडी नपा–११ से, राधादेवी थापा लम्कीचुहा नपा–५, कौशी परियार लम्कीचुहा नपा–५, पदम परियार लम्कीचुहा नपा–५, लक्ष्मीकुमारी चौधरी(कुश्मी) जोशीपुर गाउँपालिका–२, रुक्मणी महतो विक जोशीपुर गाउँपालिका–२ ओ नरेश चौधरी जोशीपुर गाउँपालिका–२ से निर्वाचित हुइल रहिट ।

जनता समाजवादी पार्टी नेपालके जिल्ला अध्यक्ष गयाप्रसाद कुश्मीके अध्यक्षतामे हुइल कार्यक्रमके वडका पहुना प्रदेशसभा सदस्य मालामति राना रहिट । कार्यक्रममे पार्टीके केन्द्रीय सदस्य आरसी यादव, थारु संघके केन्द्रीय उपाध्यक्ष घनश्याम कुश्मी, थारु संघके जिल्ला अध्यक्ष भरत चौधरी लगायतके उपस्थिति रहल रहे । नवनिर्वाचित जनप्रतिनिधिहुकन अविरमाला ओ खादा सहिट स्वागत ओ बधाई कैगिल बा ।

पार्टीके जिल्ला कोषाध्यक्ष निलम चौधरी स्वागत करल कार्यक्रमके सञ्चालन पार्टीके प्रदेश प्रस्तावित मुख्य सचिव गोविन्द राना करले रहिट ।