सुदूरपश्चिम प्रदेशसे सार्वजनिक विदाके सूचना प्रकाशित
पहुरा समाचारदाता
धनगढी, २२ जेठ । सुदूरपश्चिम प्रदेश सरकारसे २०७९ सालके सार्वजनिक विदाके सूचना प्रकाशित करले बा । २०७८ चैत २२ गते बैठल प्रदेश मन्त्रिपरिषद्के बैठकसे करल निर्णयअनुसार सार्वजनिक विदा सम्बन्धि सूचना प्रदेशके आन्तरिक मामिला तथा कानून मन्त्रालयसे प्रदेश राजपत्रमे प्रकाशन करल हो ।
राजपत्रमे प्रकाशन करल सूचनाअनुसार तीन पर्वमे प्रदेशके सक्कु जिल्ला ओ और तीन पर्वमे कुछ जिल्लामे करके ६ दिन सार्वजनिक विदा हुइना बा । प्रदेश सरकार यी वर्ष भदौ १ गते ओल्के पर्वमेफे विदा डेना निर्णय करले बा । विगतके वर्षमे ओल्के पर्वके विदा नइडेहल कहटी प्रदेशवासी विरोध करल रहिट ।
ओस्टेक करके भदौ १७ गते गौरा पर्वके अवसरमे विदा डेना निर्णय प्रदेश सरकारसे करले बा । १८ गते भर संघीय सरकार गौरा पर्वके अवसरमे विदा डेहल बा । माघ १ गते संघीय सरकारसे विदा डेहलमे माघ २ गते माघीके थप एक दिन सार्वजनिक विदा डेना निर्णय हुइल प्रदेशके आन्तरिक मामिला तथा कानुन मन्त्रालयसे प्रकाशन करल प्रदेश राजपत्रमे उल्लेख बा ।
ओस्टेक भदौ १९ गते कैलाली ओ कञ्चनपुरमे अतवारी पर्वके अवसरमे विदा डेहल बा कलेसे पुस ८ गते भुवा पर्वके अवसरमे बझाङ, अछाम, बाजुरा ओ डोटी तथा चैत १ गते कैलाली ओ कञ्चनपुरमे खखडेहरा पर्वके अवसरमे विदा डेना प्रदेश सरकारसे निर्णय करले बा ।
