नवनिर्वाचित जनप्रतिनिधिहुकनहे बधाई तथा सम्मान कार्यक्रम
पहुरा समाचारदाता
हसुलिया, २३ जेठ । राष्ट्रिय आधारभूत विद्यालय बसन्तासे नवनिर्वाचित जनप्रतिनिधिहुकनहे बधाई तथा सम्मान कार्यक्रम करले बा ।
कैलारी गाउँपालिका वडा नम्बर ७ मे रहल उ विद्यालय सोम्मार नवनिर्वाचित जनप्रतिनिधिहुकनहे बधाई तथा सम्मान कार्यक्रम करल हो । जनप्रतिनिधिहुकनहे बधाई तथा सम्मान कार्यक्रमके वडका पहुना कैलारी गाउँपालिका अध्यक्ष राजसमझ चौधरी ओ विशिष्ट पहुनामे उपाध्यक्ष भगवतीकुमारी चौधरी, गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्र बहादुर बम रहल रहिट ।
कार्यक्रमके वडका पहुना तथा गाउँपालिका अध्यक्ष राजसमझ चौधरी कैलारी गाउँपालिकाभिटर सक्कु विद्यालयके अनुगमन करके आवश्यताके आधारमे विद्यालयके आर्थिक अवस्था सुधार कैना बटैदै । उहाँ कहलै, सामुदायिक विद्यालयके भौतिक पूर्वाधार, भवन जिर्ण अवस्थामे बटै । ओम्नहे अध्यापन कराई पर्ना बाध्यता बा । आब विद्यालयमे आश्यकताके आधारमे भौतिक पूर्वाधारके व्यवस्था करजाई ।
गाउँपालिका उपाध्यक्ष भगवतीकुमारी चौधरी अपनेहुक्रे जनमतके कदर करटी आघे बढना बटैलै । उहाँ कहली, जनतासे पाँच बर्षके लाग काम कैना अवसर डेले बटै । उ अवधि भर जनताके मन जिटके डेखैना बटैलै ।
गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्र बहादुर बम यी वडामे प्लस टु सम विद्यालय नइहुके यहाँके विद्यार्थी भाडामे बैठके प्लस टु अध्ययन कैना बाध्य हुइल बटै । प्रवक्ता बम कहलै, ‘कैलारीके और वडामे पायक पर्ना ठाउँमे प्लस टु रहल बा । वडा नम्बर ७ के विद्यार्थी प्लस टु अध्ययनके लाग अन्यत्र जाई परठ । अइना शैक्षिक शत्रके लाग यिहे वडामे प्लस टु संचालनके लाग मोर पहल रही ।’
नवनिर्वाचित जनप्रतिनिधिहहुकनहे बधाई तथा सम्मान कार्यक्रममे वडा नम्बर ७ के वडा सदस्य उमेशकुमार चौधरी, सुन्दरी देवी चौधरी, आरती विक, विद्यालय व्यवस्थापन समितिके रमेश्वर चौधरी, निवर्तमान अध्यक्ष क्षेत्रपाल चौधरी, हरिराम चौधरी, शिक्षक प्रतिनिधि सुर्य प्रसाद चौधरी, जालुराम चौधरी, विद्यालयके प्रअ डम्मर प्रसाद शाह, नेपाली काँग्रेस प्रदेश सदस्य राजु बराल लगायत पहुनाके उपस्थिति रहल कैलारी गाउँपालिका अध्यक्षके स्वकीय सचिव जितेन्द्र चौधरी बटैलै ।
टुनीराम चौधरीके अध्यक्षतामे हुइल कार्यक्रमके संचालन सुर्य प्रसाद चौधरी ओ स्वागत मन्तव्य गौरीशंकर चौधरी करले रहिट । कार्यक्रममे नवनिर्वाचित जनप्रतिनिधिहुहनके फुलमाला ओ खादा सहित बधाई तथा सम्मान करल रहे ।
