शिक्षकसे बधाई तथा सम्मान कार्यक्रमसंगे ज्ञापनपत्र बुझैलै

पहुरा समाचारदाता
हसुलिया, २३ जेठ । बालविकास शिक्षक समिति ओ नेपाल विद्यालय कर्मचारी परिषदसे कैलारी गाउँपालिकाके नवनिर्वाचित जनप्रतिनिधिहुकनहे बधाई तथा सम्मान कार्यक्रम करले बा ।

सोम्मार समिति ओ परिषदसे संयूक्त रुपमे बधाई तथा सम्मान कार्यक्रमके आयोजना करके गाउँपालिकासे थप सेवाके माग करटी ज्ञापनपत्र बुझैले बटै । गाउँपालिका अध्यक्ष राजसमझ चौधरीके वडका पहुनामे हुइल कार्यक्रममे विशिष्ट पहुना गाउँपालिका उपाध्यक्ष भगवतीकुमारी चौधरी ओ प्रवक्ता तथा वडा नम्बर ७ के वडा अध्यक्ष दिपेन्द्र बहादुर बम रहल रहिट ।

कार्यक्रममे बालविकास शिक्षक समितिसे कैलारी गाउँपालिकाके शिक्षा शाखा ओ नेपाल शिक्षक महासंघहे ६ बुँदे मागसहित ज्ञापनपत्र बुझैले बा ।

ज्ञापनपत्रमे गाउँपालिकासे पैना सेवासुविधा कटौटी नइकटे पर्ना, १५ प्रतिशत सेवा सुविधा बाहेक थप सेवासुविधा गाउँपालिका स्तरीय करेपर्ना, गाउँपालिका स्तरीय बालविकास शिक्षक दरबन्दीहे स्थायी करे पर्ना माग रख्ले बटै । ओस्टेक करके गाउँपालिका स्तरीय बालविकास शिक्षकके बिरामी विदाहे सुनिश्चित करे पर्र्ना, बालविकास कक्षाकोठा व्यवस्थापन करे पर्ना ओ महंगी भत्ताके व्यवस्था करे पर्ना माग राखल बा ।

ओस्टेक करके नेपाल विद्यालय कर्मचारी परिषदसेफे सात बुँदे मागसहित गाउँपालिकाहे ज्ञापनपत्र बुझैले बा ।

परिषदसे कैलारी गाउँपालिकामे कार्यरत विद्यालय कर्मचारीके रोजगारीके सुरक्षा करे पर्ना, विद्यालय कर्मचारीके तह (का.स., खरिवार ओ ना.सु.) अनुसारके पद ओ तलबमान एकिन करे पर्ना, आ. व. २०७९/२०८० बजेट वक्तव्य अनुसार १५ प्रतिशत वृद्धि तलबके सुनिश्चिता करे पर्ना माग राखल बा ।

ओस्टेक करके हाल नेपाल सरकारसे तोकल प्रचलित न्यूनतम तलब÷स्केल ओ महगी भत्ता यिहे आर्थिक वर्षसे प्राप्त कैना सुनिश्चतता करे पर्ना, आ. व. २०७९/२०८० के कर्मचारीके तलब÷भत्ता संघीय सरकारसे डेना व्यवस्थाके लाग पहल करे पर्ना, विद्यालय कर्मचारीके दरबन्दीहे स्वीकृत दरबन्दीमे परिणत करके कार्यरत कर्मचारीहे स्थानीय निकायसे पदपूर्ति करे पर्ना ओ ६० वर्ष पुरा करके अवकाश पाइल विद्यालय कर्मचारीहुकनके हकमे कानूनमे व्यवस्था करके सेवा सुविधा उपलब्ध कराई पर्ना माग रख्ले बा ।

कैलारी गा.पा नेपाल विद्यालय कर्मचारी परिषदके अध्यक्ष सन्जुकुमार चौधरी कैलारी गाउँपालिकाके अध्यक्ष राजसमझ चौधरीहे उ ज्ञापन बुझैले रहिट । ज्ञापनपत्र बुझटी अध्यक्ष शिक्षकहुकनके मागहे विशेष ध्यान डेटी गाउँपालिकाके नीति तथा कार्यक्रममे समावेश कैना बटैलै ।

बालविकास बालविकास शिक्षक समितिके मायारानी चौधरीके अध्यक्षतामे हुइल कार्यक्रमके संचालन धनपति चौधरी करले रहिट ।