हुलाकी सडक निर्माणमे ढिलाइ
पहुरा समाचारदाता
धनगढी, २४ जेठ । कैलालीस्थित हुलाकी सडकखण्ड स्तरोन्नतिके काम सुरु हुइल २३ महिना पुग्लेसे फेन ३५ प्रतिशतसे ढिउर काम नैहुइल स्थानीयवासी गुनासो करले बाटै ।
तीस महिनामे सम्पन्न करे पर्ना सडक ३५ प्रतिशत किल निर्माण हुइलपाछे स्थानीयवासी समयमे काम सेके पर्ना कहटी दबाब डेहे लागल बाटै । स्थानीयवासी सुधा चौधरी सडक स्तरोन्नतिमे हुइटी रहल ढिलाइबारे निर्माण कम्पनीहे कडाइ कैना आवश्यक रहल बटैली ।
‘सक्कु ओर सडक धुलाम्मे बावै, मनैनहे आवतजावतमे समेत समस्या रहल बा,’ उहाँ कहली, ‘इहसे मनैनहे समस्या हुइल बा । दुई बरस पुग्लेसे फेन सडक पूरा नैहोके नागरिकहे कत्रा सास्ती हुइल बा कहे नैसेकजाइ ।’ सम्झौता मितिअनुसार काम सम्पन्न कैना आब सात महिना किल बाँकी रहल बा । तीनठो नयाँ ओ दुईठो पुरान खण्ड कैके पाँच खण्डमे विभाजन कैके काम हुइटी रहल बा ।
पुरान खण्डके काम अन्तिम चरणमे पुग सेकल रलेसे फेन लावा खण्डके भर कामके प्रगति सन्तोषजनक नैरहल हुलाकी राजमार्ग योजना कार्यालय धनगढीके इञ्जीनियर पदम मडै बटैल ।
‘पुरान ठेक्का हुइल सडकके काम सन्तोषजनक बा, विसं २०७७ मे हुइल लावा ठेक्काके प्रगति सन्तोषजनक नैहो,’ उहाँ कहलै, ‘लावा ठेक्का हुइल काममे ढिलाइ हुइटी रहल बा ।’ योजनाके काम समयमे सम्पन्न नैहोके स्थानीय नागरिकसे निर्माण व्यवसायीहे समेत घाटा हुइना डेखजाइठ् । उ विषयमे अपनेफेन सचेत रहल ओ निर्माण व्यवसायीहे घरी घरी ध्यानाकर्षण कराइल तथा कोरोना महामारीबाहेक अन्य बहानामे काम नैकरुइया निर्माण व्यवसायीहे कारबाही कैना इञ्जीनियर मडै बटैले बाटै ।
‘हमे्रे एकदम ताकेता करटी बाटी, घरी घरी छलफल करले बाटी, स्थानीय सरकारसँग फेन सहजताके लाग छलफल करले बाटी,’ उहाँ कहलै, ‘सडक निर्माणके लाग कौनो समस्या नैहो, ढिलाइ हुइनामे निर्माण व्यवसायीके कमजोरी रहल बा । आब समयमे काम नैकरल दोष उहाँहुक्रे नै पाइ परल ।’
टीकापुर नगरपालिकाके सत्तीसे धनगढी उपमहानगरपालिकाके क्याम्पस चोकसम १८ किलोमिटरबाहेक ४४ किलोमिटर सडकके स्तरोन्नतिके लाग ३० महिनाभिट्रे काम सम्पन्न कैना मेरके स्वच्छन्द जोशी जेभी काम करटी रहल बा । स्वच्छन्द जोशी जेभी रु ९७ करोड ५७ लाखमे २०७७ असारमे हुलाकी राजमार्ग निर्देशनालयसँग ठेक्का सम्झौता कैके काम सुरु करल हो । इ सम्झौताअनुसार निर्माण व्यवसायी २०७९ पुस मसान्तसम निर्माण सम्पन्न करसेके पर्ना बा ।
मने निर्माण कम्पनी स्वच्छन्द जोशी जेभीके सञ्चालक गणेश जोशी भर अपने ठेक्का सम्झौता करसेकलपाछे कोरोनाके कारण दुईचो बन्द होके काममे ढिलाइ हुइल बटैलै । ‘समयमे काम सम्पन्न करे टे नैसेक्ली,’ उहाँ कहलै, ‘काम सम्पन्न कैना सम्झौता मितिमे एक बरस समय थप करे पर्र्ना आवश्यक रहल बा । हम्रे म्याद थपके लाग अनुरोध करले बटि ।’
तीस महिनाभिट्रे काम सम्पन्न कैना मेरके सम्झौता हुइल योजनाके काम २३ महिना बित्लेसे फेन अर्थात् सम्झौता मितिके ७५ प्रतिशत समय ओरैलेसे फेन ३५ प्रतिशत किल कामके प्रगति हुइना मजा नैरहल सरोकारवाला बटैठै । सडक निर्माण हुइटी रहल क्षेत्रमे स्थानीय सरकारसे समेत निगरानी ओ कडाइ कैना आवश्यक रहल स्थानीयवासीके माग रहल बा ।
