रेशम चौधरीके रिहाइ माग कैटी लोसपासे प्रधानमन्त्रीहे ज्ञापनपत्र

काठमाडौँ, २४ जेठ । प्रधानमन्त्री शेरबहादुर देउवाहे महन्थ ठाकुर नेतृत्वके लोकतान्त्रिक समाजवादी पार्टीसे ११ बुँदे ज्ञापनपत्र बुझैले बा । मंगरके सकारे प्रधानमन्त्री निवास बालुवाटार पुगके लोसपाके नेताहुक्रे नागरिकता विधेयक, मधेस तथा थरुहट आन्दोलनकारीउपर लागल मुद्दा फिर्ता ओ रिहाइ तथा सम्झौता कार्यान्वयन लगायतके माग समेटल ज्ञापनपत्र बुझाइल हुइट ।

ज्ञापनपत्रमे देउवा नेतृत्वके सरकार निर्माण हुइना बेला करल प्रतिबद्धता कार्यान्वयने लाग आग्रह करल बा । ज्ञापनपत्रमे कहल बा, ’संविधानअनुसार जन्मसिद्ध नागरिकके सन्तानहे अबिलम्व नागरिकता प्रमाणपत्र प्रदान कैना ओ वैवाहिक अंगीकृतसम्बन्धी हालसम कायम रहल कानुनी व्यवस्थाहे निरन्तरता डेना ।’

ओस्टके, मधेस ओ थरुहट आन्दोलनकारीउपर लगाइल मुद्दा फिर्ता ओ निलम्बित सांसद रेशम चौधरीहे रिहाइके माग करल बा । लोसपासे किसानहे मलखादके व्यवस्था अविलम्ब कैना फेन सरकारसँग माग करल बा । प्रधानमन्त्रीहे ज्ञापनपत्र बुझाइ अध्यक्ष ठाकुर, नेता राजेन्द्र महतो, शरतसिंह भण्डारी, अनिल झा, लक्ष्मणलाल कर्ण, चन्दा चौधरी, उमाशंकर अरगरियालगायत बालुवाटार पुगल रहिट । प्रधानमन्त्रीसँग कांग्रेस उपसभापति पूर्णबहादुर खड्का फेन उपस्थित रहल रहिट ।