प्रहरीके गोली लागके बर्दिया बधुवनके नवीना चौधरीके मृत्यु
बर्दिया, २४ जेठ । समस्याग्रस्त बाघहे नियन्त्रणमे लेना माग कैटी सडक अवरोध कैके प्रदर्शनमे उत्रल सर्वसाधारण ओ प्रहरीबीच झडप हुइबर एक जनहनके मृत्यु हुइल बा । सडक खुलाइ बेर हुइल झडपमे गोली लागके घाहिल हुइल मधुवन–२ की १८ वर्षीया नवीना चौधरीके मृत्यु हुइल बा । कखौरी टर गोली लागल राकेश चौधरीके उपचार हुइटी रहल बा ।
एसपी वीरबहादुर शाहीके अनुसार स्थानीयके ढुंगामुढासे प्रहरी ओर ९ जाने घाहिल हुइल बाटै । बर्दियाके वन्यजन्तुपीडित सोम्मार सकारेसे सडकमे उटरके विरोध प्रदर्शन करल रहिट । साँझ ६ बजे ओराली बजारमे झडप हुइल रहे । समस्याग्रस्त बाघुवाहे नियन्त्रणमे लेहक लाग घरी घरी आग्रह कैलेसे फेन सुनुवाइ नैहुइलपाछे स्थानीय बासिन्दा सडकमे उत्रल हुइट । प्रहरी सडकमे प्रदर्शन नैकैना आग्रह कैलेसे फेन प्रदर्शनकारी सोम्मारके सकारेसे सडकमे मोर्चा बनाके बैठल रहिट । वनके प्रमुख ओ प्रमुख जिल्ला अधिकारी प्रतिबद्धता नैजनाइटसम सडक जाम नैखोल्ना कहटी उहाँहुक्रे प्रदर्शन करल रहिट । भीड नियन्त्रणमे लेना प्रहरी लाठी प्रहार, १० राउन्ड अश्रुग्यासके साथे गोली चलाइल प्रमुख जिल्ला अधिकारी बन्धुप्रसाद बाँस्तोला बटैलै । प्रदर्शनकारी ढुंगा मारे नैरोकलपाछे प्रहरी गोली चलैना बाध्य हुइल उहाँ बटैलै ।
स्थानीयवासी खगेन्द्रबहादुर शाही कहलै शान्तिपूर्ण प्रदर्शनमे प्रहरी एक्कासि निर्मम आक्रमण करल दाबी करलै । प्रहरीके लाठी ओ अश्रुग्याससे दर्जनसे ढिउर प्रदर्शनकारी घाहिल हुइल उहाँ बटैलै । शाही समस्याग्रस्त बाघुवाहे नियन्त्रणमे लेना घरी घरी आग्रह करल दुई अँठ्वार बिट्लेसे फेन वास्ता नैकरल ओरसे बाध्य होके सडकमे उत्रे परल सुनैलै ।
‘गोली चलाइ पर्र्ना अवस्था नैरहे,’ स्थानीयवासी सुरेश पन्थ कहलै, ‘प्रहरीके ज्यादती हुइल । वन्यजन्तुपीडितउपर प्रहरी थप पीडा थप्ले बा ।’ स्थिति तनावपूर्ण डेखलपाछे वहाँँ थप प्रहरी बल तैनाथ करल बा । गाउँगाउँसे ढिउर संख्यामे मनै ओराली बजारमे आके फेनसे आन्दोलन करटी रहल बा ।
इहे बीच मधुवन नगरपालिकामे इहे घटनाहे लेके नेपाल प्रहरी, सशस्त्र प्रहरीके डिआइजी, प्रजिअ, प्रहरी प्रमुख लगायत सर्वदलीय बैठक बैठल बा ।
बैठकमे सहभागी माओवादी केन्द्रके नेता सुरेश पन्थ प्रहरीसे गोली चलाइ नैपर्ना अवस्थामे मनैनमे ताकके मारल, प्रदर्शनकारी प्रजिअ, वनके प्रमुखहे ओराली बजारमे छलफलके लाग बलाइलमे नैआइलपाछे जबरजस्ती बल प्रयोग करल कहटी दलके प्रतिनिधी आक्रोश पोखल बटाइल बा । छलफल जारी रहल बा ।
प्रहरीके गोली लागके मृत्यु हुइल चौधरीके शव अस्पतालमे ढारल बा । ओहकान शव परीक्षण आभिनसम नैहुइल हो ।
खाता जैविकमार्गमे विगत तीन बरस यहोर खाता जैविकमार्गमे नौ जनहनके बाघनके आक्रमणसे ज्यान जासेकल बा । १३ दिनआघे खाता जैविकमार्गके मधुवन नगरपालिका—२ मे छेग्री चह्राइ गैल ४९ वर्षिया कौशिका पाल बाघुवाके आक्रमणमे मृत्यु हुइल रहे । जनजागृति सामुदायिक वनुवामे बाघुवाके आक्रमण हुइल १३ दिनमे उहे ठाउँमे सोम्मारके सकारे खेट्वा गैल ४१ वर्षीया अस्मिता थारुहे बाघुवा आक्रमण कैके गम्भिर घाहिल बनाइल रहे ।
इ क्षेत्रमे निरन्तर बाघनके आक्रमण बह्रलपाछे प्रदर्शनमे उत्रल हुइट । मनैनके ज्यान जैना, घाहिल हुइ लागलपाछे स्थानीय समस्याग्रस्त बाघनहे नियन्त्रणमे लेहे पर्ना ओ तारबार लगैना माग करले बाटै ।
घटना छानबिन कैना गृहसे समिति गठन
गृह मन्त्रालयसे बर्दिया जिल्लाके मधुवन नगरपालिका २ मे सोम्मारके नविना चौधरीके मृत्यु हुइल घटनाबारे छानबिन कैना ५ सदस्यीय छानबिन समिति गठन करले बा ।
मन्त्रीस्तरीय निर्णयसे गृहमन्त्री बालकृष्ण खाँण गृहके सहसचिव हरि घिमिरेके संयोजकत्वमे ५ सदस्यीय छानबिन समिति गठन करल हुइट । समितिसे काम सुरु करल मितिसे ७ दिनभित्रे घटनाके सम्बन्धमे स्थलगत अध्ययनसहित छानबिन कैके प्रतिवेदन पेस कैना कार्यादेश डेहल गृह मन्त्रालय स्रोत जानकारी डेले बा ।
समितिमे राष्ट्रिय निकुञ्ज तथा वन्यजन्तु संरक्षण विभागके उपमहानिर्देशक (सहसचिव) वेदकुमार ढकाल, नेपाल प्रहरीके उपरीक्षक कृष्ण कोइराला, राष्ट्रिय अनुसन्धान विभागके उपअनुसन्धान निर्देशक विकास पाण्डे ओ गृहके उपसचिव ध्रुव खड्का सदस्य रहल बाटै ।
