फाप्ला क्रिकेट मैदान तथा खेलग्राम पूर्वाधार निर्माण विकास समितिके अध्यक्षमे शाही

पहुुरा समाचारदाता
धनगढी, २४ जेठ । सरकारसे फाप्ला क्रिकेट मैदान तथा खेलग्राम पूर्वाधार निर्माण विकास समितिके अध्यक्षमे फाप्ला क्रिकेट रंगशाला निर्माण अभियानके अभियान्ता सुवाश शाहीहे मनोनित करले बा । सोम्मारके बैठल मन्त्रीपरिषद्के बैठकसे युवा तथा खेलकुदमन्त्रालयके सिफारिसमे शाहीहे अध्यक्षमे मनोनित करल हो ।

सरकारसे गैल बैशाख २६ गते ‘फाप्ला क्रिकेट मैदान तथा खेलग्राम पूर्वाधार निर्माण विकास समिति आदेश २०७९’ राजपत्रमे प्रकाशित करल रहे । उक्त आदेश बमोजिम मन्त्रीपरिषदसे समितिहे पूर्णता डेहल हो ।

विकास समिति आदेशमे रंगशाला तथा खेलमैदान निर्माणमे मुख्य कार्यकारी भूमिका रहना समिति ९ सदस्यीय रहना व्यवस्था करल रहे । जेकर नेतृत्वके रुपमे फाप्लामे अन्तर्राष्ट्रिय क्रिकेट रंगशाला निर्माणके परिकल्पनाकार शाहीहे सरकार आघे सारल हो ।

धनगढी मुख्य चौराहासे ५ किलोमिटर उत्तरपश्चिममे अवस्थित फाप्ला क्षेत्रके साढे ३८ विघा क्षेत्रफलमे सरकारसे फाप्ला अन्तर्राष्ट्रिय क्रिकेट मैदान ओ खेलग्राम निर्माण कैना इहीसे आघे टुंगो लगासेकल रहे । फाप्लाके पहिचानसे जग्गा प्राप्तिसम अनवरत रुपमे खटल शाही नेतृत्वके विकास समितिहे उक्त क्षेत्रमे अन्तर्राष्ट्रिय क्रिकेट रंगशालासहित टमान खेलके पूर्वाधार निर्माणके जिम्मेवारी हुइना बा ।

शाहीके नेतृत्वमे सन् २०१५ से नै फाप्लामे अन्तर्राष्ट्रिय क्रिकेट रंगशाला निर्माण अभियान सुरु करल रहे । गौचरणके रुपमे रहल फाप्लाहे शाही स्तरोन्नती कैटी सुरुमे स्थानीय लिग सञ्चालन करल रहिट । नेपालके पहिल फ्रेन्चाइज लिग क्रिकेटके रुपमे धनगढी प्रिमियर लिग(डीपीएल)के आयोजना शाही फाप्लामे कराइलपाछे भर राष्ट्रिय–अन्तर्राष्ट्रियमे चर्चा पाइल रहे ।
ओटठनसे लगातार फाप्लामे रंगशाला निर्माण अभियानमे खटल शाही स्थानीय निकाय, प्रदेश सरकार ओ केन्द्र सरकारसँग नियमित समन्वयन कैटी फाप्लाहे राष्ट्रिय प्राथमिकताके आयोजनामे पर्ना सफल हुइल रहिट ।

कांग्रेस सभापति शेरबहादुर देउवा प्रधानमन्त्री नियुक्त हुइलपाछे भर फाप्ला क्रिकेट मैदान तथा खेलग्राम पूर्वाधार निर्माण विकास समितिके कार्य गति लेहल हो । कांग्रेस नेतृ तथा समाजसेवी आरजु राणा देउवा सुदूरपश्चिमके मुहार फेरडेना इ प्रोजेक्टहे विशेष चासो डेटी प्राथमिकतामे रख्ना विशेष पहल करलसँगे विकास समिति मोडेलमे फाप्ला निर्माण कार्यआघे बह्रल हो ।

अध्यक्ष शाही सरकारहे धन्यवाद डेटी सुदूरपश्मिके ड्रिम प्रोजेक्टमे रहल फाप्लाहे आघे बह्रैना नेतृत्वदायी भूमिका खेलुइया प्रधानमन्त्री देउवा ओ नेतृ राणा देउवाप्रति आभार व्यक्त करलै । उहाँ निर्धारित समयमे रंगशाला निर्माणके कार्य सम्पन्न करैना अपने दिनरात नैकहिके कार्य कैना प्रतिबद्धता जनैलै ।

‘फाप्लामे रंगशाला ओ खेलग्राम निर्माण कार्य आघे बहै्रना जिम्मेवारी मै पूरा करे सेकम कहिके विश्वास करलमे नेपाल सरकारप्रति आभार व्यक्त करटुँ,’ शाही संक्षिप्त प्रतिक्रिया डेटी कहलै, ‘विकास समितिके गठनसँगे आब रंगशाला निर्माणके काम गति लेना बा । हमे्र निर्धारित समयमे रंगशाला निर्माणमे प्रतिबद्ध बाटी ।’

गठन आदेश अनुसार पहिल वैठक बैठल मितिसे तीन बरससम समितिके कार्यकाल रहना व्यवस्था करल बा । यदि पूर्वाधार निर्माणके कार्य तोकल समयमे सम्पन्न नैहुइटसम समितिके सिफारिसमे नेपाल सरकार एक–एक बरस कैके दुईचो पदावधि थप करे सेक्ना आदेशमे उल्लेख बा ।

समितिसे क्रिकेट मैदान तथा खेलग्राम निर्माणके लाग विस्तृत परियोजना प्रतिवेदन तयार कैके स्वीकृत कैना, संरचना निर्माण करेबर प्रचलित कानून बमोजिम करे पर्ना प्रारम्भिक वातावरणिय परिक्षण वा वातावरणिय प्रभधाव मूल्यांकन करैना, संरचना निर्माणके लाग आवश्यक आर्थिक स्रोत जुटैना, क्रिकेट मैदान तथा खेलग्रामके पूर्वाधार निर्माण सम्पन्न कैना, पूर्वाधार निर्माण सम्पन्न हुइलपाछे सञ्चालन तथा व्यवस्थापनके खाकासहित नेपाल सरकारहे हस्तान्तरण कैना लगायतके जिम्मेवारी पूरा करे पर्ना बा ।

शाहीके अध्यक्षतामे बनल ९ सदस्यीय समितिके सदस्यमे धनगढी उपमहानगरपालिका ओ कृष्णपुर नगरपालिकाके नगर प्रमुख पदेन सदस्य रहना बाटै । उ बाहेक सुदूरपश्चिम प्रदेश सरकारके खेलकुद हेर्ना मन्त्रालयके सचिव, कैलालीके प्रमुख जिल्ला अधिकारी, शहरी विकास तथा भवन निर्माण विभाग, संघिय आयोजना कार्यान्वयन ईकाई कैलालीके प्रमुख, उद्योग वाणिज्य संघ कैलालीके अध्यक्ष तथा नेपाल सरकारसे मनोनयन करल महिला सदस्यमे स्थानीय कल्पना दिवाकोटी समितिके सदस्य रहना बाटी ।

परियोजनाके प्रशासकीय जिम्मेवारी वहन कैना खेलकुद मन्त्रालयसे उपसचिव सरहके एकजाने निजामती कर्मचारीहे कार्यकारी निर्देशकके जिम्मेवारी डेना आदेशमे उल्लेख बा ।