कैलारी गाउँपालिकाके टमान योजनाके अनुगमन

पहुरा समाचारदाता
हसुलिया, २४ जेठ । कैलारी गाउँपालिकाभिटर सम्पन्न योजनाके गाउँपालिका स्तरीय अनुगमन समितिसे अनुगमन करले बा ।

गाउँपालिका उपाध्यक्ष तथा अनुगमन समितिके संयोजक भगवतीकुमारी चौधरीके नेतृत्वमे मंगरके रोज अनुगमन करल हो ।

अनुगमन समितिसे कैलारी गाउँपालिका–७ भुँइयाफाटामे १५ लाखमे निर्माण हुइल अनुग्रह चर्च मण्डली भवन, कैलारी–५ बैजपुरमे २० लाखमे निर्माण हुइल सभाहल, कैलारी–३ बसन्ता वन क्षेत्र सामुदायिक वन उपभोक्त समुह समन्वय समितिसे ५ लाखमे उत्पादन करल बेर्ना, प्रदेशके योजना अन्र्तगत मोहना लडियामे निर्माण हुइल भौतिक तटबन्ध ओ कैलारी गाउँपालिका–७ मे संचालन हुइल प्रधानमन्त्री स्वरोजगार पारिश्रमिकमे आधारित सम्पन्न हुइल परियोजनामे अनुगमन करल योजना शाखा प्रमुख तथा अनुगमन समितिके सदस्य सचिव सन्तोषकुमार चौधरी बटैलै ।

गाउँपालिका स्तरीय अनुगमन टोलीमे पूर्वाधार विकास समितिके संयोजक प्रेमबहादुर चौधरी, गाउँपालिकाके प्रवक्ता तथा वडा नम्बर ७ के अध्यक्ष दिपेन्द्र बहादुर बम, वडा नम्बर ५ के वडा अध्यक्ष विष्णु प्रसाद चौधरी, अनुगमन समिति सदस्य सुनिला चौधरी, प्राविधिकमे अयसा खाती सव इन्जिनियर, मेनुका चौधरी सव इन्जिनियर ओ दिवराज जोशी सव इन्जिनियर रहल रहिट ।