वन विकासके लाग कानुन कार्यान्वयन कैना आवश्यक
सागर कुस्मी
गुलरिया, २५ जेठ । कंचनपुरके कृष्णपुर नगरपालिका–६, बन्जरियामे रहल महाकाली सामुदायिक वन उपभोक्ता समूह एक परिचयात्मक अन्तरक्रिया कार्यक्रममे सहभागी हुइल सरोकार ओइने सामुदायिक वन विकासके लाग कानुन कार्यान्वयन कैनामे जोर लगैले बटैं ।
प्रदेश सरकार वन ऐन बनैलेसेफेन कार्यविधि ओ निर्देशिका नैबनके अन्यौल अवस्था रहल कार्यक्रमके सहभागी ओइने अइसिन बात बट्वइलक हुइँट । सामुदायिक वन संरक्षणके क्रममे चुनौती ओ समस्यासे जुझ्टी सफलताके चरणमे पुगल बटि वनके अध्यक्ष वीरबहादुर राजवंशी कलैं, सकारात्मक पक्षके समिक्षा ओ कमिकमजोरीसे सिकाइ हुइल बा ।
वन संरक्षणमे सब उपभोक्ता सक्रिय हुइल ओर्से अझ्कल बाध्यात्मक चोरी हुइना ओ जानजानके चोरी हुइना काम हटल बा उहाँ कलैं । उपभोक्ता ओइनके सक्रियतासे सामुदायिक वन अब्बे सुन्दर ओ लोभावन बिल्गाइठ ।
पुनरोत्पादन आश करल अनुरुप वन क्षेत्र पुनर्जीवन पैले बा उहाँ कलैं, वन संरक्षणमे मद्दत पुगुइया उपभोक्ता वन पैदावारके उपभोग कैके आवश्यकता पूर्ति कर्टी आइल बा । आर्थिक रुपमे सवल हुइनाके संगे महिलनहे सामुदायिक वन सशक्तिकरणके कार्यक्रम मार्फत गरिबी निवारण ओ उद्यमशिलता विकासके कार्यक्रम संचालन कैके जिनगी चलैना सजिल हुइल बा । घुम्ती कोष संचालन कैके आर्थिक रुपमे विपन्न परिवारके जीविकापार्जनके कार्यक्रम कर्टी आइल बा ।
ओहेमारे उपभोक्तनके आयस्तरमे वृद्धि हुइटी रहल उपभोक्ता ओइनके कहाइ बटिन । स्थानीय तहहे सामुदायिक वन १२ लाख ओ संघीय सरकारहे २१ लाख कैके सामुदायिक वन वार्षिक रुपमे ३३ लाख कर किल बुझैटी आइल बा । कर अनुसारके सामुदायिक वनके विकासके लाग सरकारके तरफसे समेत लगानी हुइ पर्ना कार्यक्रमके सहभागी ओइने बट्वइलैं ।
पिपरैया सव डिभिजन वन कार्यालयके प्रमुख नविन सिंह सामुदायिक वन आवश्यकताके आधारमे किल उपभोक्तनहे न्यायोचित तरिकासे कठुवा ओ कठी वितरण कैना प्रणालीके विकास करे पर्ना बटैलैं । पूर्व वडा सदस्य सीता चौधरी उपभोक्ता सक्कु जे सामुदायिक वन बनाइक लाग सघाउ पुगाइल ओर्से उपभोक्तनहे पहिल प्राथमिकता डेके वन पैदावारके उपभोगमे सहभागी कराइ पर्ना बटैलैं ।
काठी पाटा उपभोक्तन पैटी बटैं उहाँ कलैं, अभिन वन पैदावार वितरण प्रणालीहे परिस्कृत करे पर्ना बा । उपभोक्तनके हितमे जबफेन सामुदायिक वन न्याय कैके काम करे परठ । नेपाली काँग्रेसके प्रतिनिधि गजेन्द्र सिंह धामी गरिबी निवारणमे सामुदायिक वनके ढेर भूमिका रहल बटैलैं ।
गरिबीके पंक्तिसे टरे रहल उपभोक्तनके पहिचान कैके निःशुल्क रुपमे काठी, पाटा, कठुवा उपलव्ध करैना व्यवस्थासंगे सामुदायिक वन उच्च शिक्षा पर्हुइया उपभोक्तनके लर्कापर्कनहे छात्रबृत्ति डेना व्यवस्था करे पर्ना उहाँ बटैलैं ।
कृष्णपुर नगरपाकिकाके नगरप्रमुख हेमराज ओझा सामुदायिक वनसंग सहकार्य कैके आघे बर्हक लाग तयार रहल बटैलैं । म्याचिङ फण्डमे सहकार्य कर्ना तयार बटि उहाँ कलैं, एकर लाग हलि पहल हुइ । शिर झुकैना काम महिनसे नाइ हुइ उहाँ कलैं ।
जनप्रतिनिधि हुइल ओर्से जिम्मेवारी पूर्वक काम करे पर्ना मोर कर्तव्य हो । ओकर लाग हम्रे लागल बटि । कार्यक्रमे वडा नम्बर ६ के वडा सदस्य आस्पती राजवंशी, चक्र रैकाल, सामुदायिक वनका उपाध्यक्ष गणेश कुवँर लगायत अपन मन्तव्य डेले रहिंट । कार्यक्रम वनके अध्यक्ष वीरबहादुर राजवंशीके अगुवाइमे हुइल रहे कलेसे सहजीकरण रामकृष्ण चौधरी कैले रहिंट ।
