गोदावरीमे पञ्चमुखी शिवलिंग अनावरण हुइना

पहुरा समाचारदाता
धनगढी, २४ जेठ । कैलालीके धार्मिक तथा पर्यटकीय स्थल गोदावरीधाममे पञ्चमुखी शिवलिंग (कैवल्यनाथ) अनावरण करना हुइल बा । जेठ २६ गते गंगादशराहाके अवसरमे शिवलिंग अनावरण करे लागल हो ।

मंगरके रोज धनगढीमे गोदावरीधाम विकास समिति पत्रकार सम्मेलन कैके भगवान कैवल्यनाथके अनावारण करना जानकारी डहल ।

समितिके संयोजक मदनराज पाण्डेके अनुसार पञ्च प्रकृतिके प्रतिक भगवान शिवके सद्योजात, वामदेव, तत्पुरुष, अघोर ओ ईशान नामक पाँच अवतारके समष्तिगत स्वरुप कैवल्यनाथके प्राँण प्रतिष्ठा एवं अनावरण तथा शालिग्राम शिला स्थापना करजाइ । अनावरण शुकके रोज बिहान साढे ९ बजे करना जनागिल बा ।