विपद व्यवस्थापन सम्बन्धी अभिमुखीकरण
पहुरा समाचारदाता
धनगढी, २५ जेठ । विपद व्यवस्थापन सम्बन्धी सञ्चारकर्मीसंग करल अभिमुखिकरण कार्यक्रम धनगढीमे सम्पन्न हुइल बा ।
प्राक्टिकल याक्सनके आयोजनामे हुइल अभिमुखिकरण कार्यक्रममे विपद्के बेला कैसिक सूचना संकलन कैना, मौसम पुर्वानुमानके सूचना कैसिक पत्ता पैना लगायतमे विषयमे पत्रकारहे जानकारी कराइल रहे । कार्यक्रममे अपन प्रस्तुती रख्टी मौसम विज्ञ डा. धर्मराज उप्रेती आम नागरिकहे मौसम पुर्वानुमानके सूचना सम्प्रेसण कैना ओ विपद्के क्षति कम कैना पत्रकारके भुमिका महत्वपूर्ण रहल बटैलै । उहाँ विपद न्यूनिकरण कैना नेपाल सरकार हस्ताक्षर करल अन्तर्राष्ट्रिय सन्धीके बारेमे समेत जानकारी कराइल रहिट ।
कार्यक्रममे मौसम विज्ञ उप्रेती मौसमके पुर्वानुमान कैना नेपाली प्रणाली ओ भारतीय मौसम प्रणालीके बारेमे समेत जानकारी कराइल रहिट । सरकारसे विपद पूर्व सूचना प्रणालीमे लगानी कैना आनाकानी करेबेर विपदके कारण ढेर क्षति हुइना करल उहाँ बटैलै । प्राक्टिकल याक्सनके प्रोजेक्ट मेनेजर विक्रम राना विपदके पुर्व तयारी नइकरके नेपालमे ढेर क्षति हुइना करल बटैलै ।
‘विपदके पूर्व तयारीमे लगानी नइबढाके क्षति न्यूनीकरण करे नइसेक्जाई,’ उहाँ कहलै, ‘मने सरकारसे हालसम पूर्व तयारीमे खासे चासो नइदेखैना करल हो ।’
उहाँ पत्रकारहेफे पुर्व तयारीके समाचारमे जोड डेना आग्रह करलै । ‘मनसुन सक्रिय हुइलपाछे केल विपदके बारेमे सूचना सम्प्रेषण कैना हमार ट्रेन डेखल बा,’ उहाँ कहलै, ‘मने पूर्व तयारीके बारेमे खासे सुचना सम्प्रेसण हुइल नइपाजाइठ, आम सञ्चारमे पूर्व तयारीके समाचार आई सेक्लेसे सरकारहे दवाव परे सेकी ।’ उहाँ विपद्के वेला प्रभावित नागरिकके लाग तयार करल सुरक्षित स्थानमे फे कुछ कम्जोरी रहल बटैलै ।
सुरक्षित स्थान निर्माण करेबेर भुकम्प प्रतिरोधि, ओत लग्ना ओ कुछ दिन बैठे मिल्न करके निर्माण करे परठ,’ मने ढेर सुरक्षित स्थान ओसिन नइहो, अइना दिनमे सो बाटमेफे ध्यान डेहे परठ ।’
नेपाल पत्रकार महासंघ कैलालीके अध्यक्ष हिमालय जोशी विपद सम्बन्धी पत्रकारहे करल अभिमुखिकरण ढेर प्रभावकारी ओ जानकारी मुलक हुइल बटैलै । यी अभिमुखिकरण कार्यक्रम विपद् सम्बन्धी समाचार लिखेक लाग ढेर ढेर प्रभावकारी बा,’ अध्यक्ष जोशी कहलै, ‘पत्रकारसेफे चासोके साथ कार्यक्रममे भाग लेले बटै ।
अइना दिनमेफे यैसिन कार्यक्रम करके विपद सम्बन्धी समाचार लिख्न संस्थासे सहयोग करी कना अपेक्षा बा ।’ कार्यक्रममे याक्सन नेपालके वरिष्ट कार्यक्रम अधिकृत अध्यक्ष चक्र बम सहजीकरण करले रहिट ।
