१४ उद्योग विरुद्ध मुद्दा दायर

पहुरा समाचारदाता
धनगढी, २५ जेठ । खाद्य ऐन प्रतिकुल कार्य करुइया कैलालीका १४ ठो उद्योग विरुद्ध जिल्ला प्रशासन कार्यालयमे मुद्दा दायर हुइल बा ।

खाद्य प्रबिधि तथा गुण नियन्त्रण कार्यालयके प्रमुख नवराज दहाल नौ महिनाके अवधिमे १४ ठो उद्योग विरुद्ध जिल्ला प्रशासन कार्यालयमे मुद्दा दायर हुइल जनैलै । उहाँ कहलै, खाद्य तथा ऐन अनुरुप संकलन करल नमूना मन्से प्रतिकुल पाइल जम्मा ३२ नमूनाके कार्वाही प्रक्रिया आघे बढाइल बा । यी क्रममे उद्योगी व्यवसायीहुकनसंग बयान लेना, सरकारी वकिलसे राय निकास लेना कार्यफे आघे बह्राइल बा ।’

मुद्दा दायर हुइल उद्योगमे वाउ म.स. उद्योग धनगढी (फ्रोजन म.म.), हरि बेकरी उद्योग कैलारी (क्रिम विस्कुट), रोहित पाउरोटी उद्योग कैलारी (खस्ता विस्कुट), फास्त फुड उद्योग धनगढी (चाउमिन), फास्त फुड उद्योग धनगढी (भिनेगर), फास्त फुड उद्योग धनगढी (क्यारामेलकलर), थापा चाउमिन उद्योग धनगढी(चाउमिन) रहल बटै ।

ओस्टेक करके गोलादेउ फुड प्रोडक्स गोनपा कैलाली (मिक्स भेज टोमेटो सस), गोलादेउ फुड प्रोडक्स गोनपा कैलाली (क्यारामेल कलर), गोलादेउ फुड प्रोडक्स गोनपा कैलाली (सिन्थेटिक भिनेगर), पाण्डेय फुड प्रोडक्स गोदवारी कैलाली (क्यारामेल सस), विशाल पाउरोटी उद्योग लम्कीचुहा कैलाली (पाउरोटी), सदिक्षा फुड प्रोडक्स लम्कीचुहा (चाउमिन) ओ सदिक्षा फुड प्रोडक्स लम्कीचुहा भिनेगर) रहल बा । मुद्दा परल यी उद्योगसे उत्पादन करल बस्तुमे लेवल तथा प्रशोधन कक्षमे स्वच्छताके अवस्था कम्जोर डेखल खाद्य प्रबिधि तथा गुण नियन्त्रण कार्यालयके प्रमुख नवराज दहाल बटैलै ।

खाद्य प्रविधि तथा गुण नियन्त्रण कार्यालय, धनगढीसे आ व २०७८/७९ के टिसरा त्रैमासिक तथा ९ महिनाके खाद्य तथा दाना उद्योग सिफारिस, अनुज्ञापत्र जारी तथा नवीकरण कार्यक्रम करले बा ।

आ व २०७८/७९ के टिसरा त्रैमासिक अवधिमे यी कार्यालयसे ३० ठो खाद्य उद्योग ओ १ ठो दाना उद्योग सिफारिस करले बा । २४ ठो नयाँ खाद्य उद्योगके अनुज्ञापत्र, (गुणस्तर लाइसेन्स) जारी करल बा कलेसे २४ ठो खाद्य उद्योगके अनुज्ञापत्र सालवसाली नवीकरण करल बा । घरेलु तथा साना कार्यालयमे उद्योग दर्ता हुई अइना क्रममे खाद्य तथा दाना उद्योगके हकमे यी कार्यालयसे सिफारिस लेहे पर्ना व्यवस्था रहल खाद्य प्रबिधि तथा गुण नियन्त्रण कार्यालयके प्रमुख दहाल बटैलै । नयाँ उद्योगसे गुणस्तर लाइसेन्स अनिवार्य लेके केल उत्पादन विकी वितरण करे पैना ओ प्रत्येक वर्ष उ लाइसेन्स नवीकरण करे पर्ना व्यवस्था रहल उहाँ बटैलै ।

यी आ व २०७८/७९ के ९ महिनामे ११३ खाद्य उद्योग ओ ४ दाना उद्योग सिफारिस करल, ७० नयाँ खाद्य उद्योग ओ १ नयाँ दाना उद्योगहे अनुज्ञापत्र जारी करल ओ २१४ खाद्य उद्योग ओ ४ दाना उद्योगके अनुज्ञापत्र नवीकरण करल प्रमुख दहाल बटैलै ।
९ महिनाके अवधिमे बजारमे विकी हुइना ओ होटल रेस्टुरेन्टमे तयार कैना खाद्य पदार्थके स्वच्छता ओ गुणस्तर नियमनओर संयुक्त टोलीमार्फत ६८ चो ओ खाद्य निरिक्षक मार्फत ६७ चो खाद्य बजारके अनुगमन करल उहाँ जनैलै ।

५४ ठो होटल रेस्टुरेन्टके अनुगमन, २५५ ठो खाद्य तथा दाना उद्योगके अनुगमन करके पसल तथा होटल रेस्टुरेन्टहे स्वच्छता सुधारके लाग परामर्श देना ओ उपभोग्य अवधि समाप्त हुइल, गुणस्तरहीन खाद्य वस्तु जफत करके नष्ट कैना कामफे हुइल प्रमुख बटैलै ।

उपभोक्तनहे खाद्य स्वच्छतामे ध्यान डेना आग्रह

उपभोक्ता हकहितके क्षेत्रमे कार्यरत अगुवाहुक्रे उपभोक्ताहुकनहे खाद्य स्वच्छतामे विचार पुगैना आग्रह करले बटै । मंगरके रोज धनगढीमे खाद्य स्वच्छता दिवसके अवसरमे हुइल कार्यक्रममे उपभोक्ता हकहितके क्षेत्रमे कार्यरत अगुवाहुक्रे ओसिन आग्रह करल रहिट ।

साल्ट ट्रेडिङ कर्पोरेशन क्षेत्रीय कार्यालय धनगढीके प्रमुख केशव पाण्डे २०५६ साल जम्मा दुई प्रतिशत जनता आयोडिन नुनके प्रयोग करलमे अब्बे ९० प्रतिशत पुगल बटैलै । कैलाली जिल्लामे सबसे ढेर अनुगमन हुइना मने उपभोक्ता अभिन सचेत हुई नइसेकल उहाँ बटैलै ।

उपभोक्ता हकहित संरक्षण मञ्चके केन्द्रीय उपाध्यक्ष धनपति ढुङेल घरके खानासे बजारके खानामे ढेर मिसावट असुरक्षित रहल ओरसे उपभोक्ताहुक्रे कौनोफे सामान खरिद करेबेर ध्यान पुगैना आग्रह करलै । उहाँ भन्साहे स्वास्थ्य बनैलेसे अस्पताल जाई नइपर्ना बटैलै ।

उपभोक्ता हकहित संरक्षण मञ्चके प्रदेश सचिव भोजराज जोशी खाद्य वस्तु उत्पादकहुक्रे अपनेफे उपभोक्ता रहल महसुश कैना जरुरी रहल बटैलै । कार्यक्रममे होटल व्यवसायी महासंघ कञ्चनपुरके अध्यक्ष जगदिश चन्द्र भट्ट, गोदावरी होटल व्यवसायी संघके अध्यक्ष घना चोखाल लगायत उपभोक्ताहुकनहे खाद्य स्वच्छतामे विचार पुगैना आग्रह करल रहिट ।

कार्यक्रम खाद्य प्रबिधि तथा गुण नियन्त्रण कार्यालयके प्रमुख नवराज दहालके अध्यक्षतामे हुइल रहे । उहाँ कार्यालयसे कैगिल गतिविधिबारे जानकारी डेहल रहिट । कार्यक्रमके संचालन प्राविधिक सरोज पौडेल करल रहिट ।