धनगढी नगर भलमन्सा अध्यक्षमे रोहित चौधरी

पहुरा समाचारदाता
धनगढी, २४ जेठ । धनगढी उपमहानगरपालिकाके नगर भलमन्सा समितिके अध्यक्षमे रोहित चौधरी चयन हुइल बटै ।

मंगरके रोज हुइल पहिल अधिवेसनसे रोहित चौधरीके अध्यक्षतामे ११ सदस्यीय लौवा कार्यसमिति चयन करल हो ।

समितिके उपाध्यक्षमे रामनारायण चौधरी, सचिवमे बिन्तीराम चौधरी ओ कोषाध्यक्षमे रामप्रसाद चौधरी चयन हुइल बटै ।

ओस्टेक करके सदस्यमे भोजराम राना, जोगीलाल चौधरी, श्री कृष्ण राना, गौरीलाल् जोशी, जानकी चौधरी, फागुराम चौधरी, ओ जीतराम चौधरी रहल बटै ।

तर्दथ समितिके संयोजक सरोजकुमार चौधरीके अध्यक्षतामे हुइल कार्यक्रममे धनगढी उप महानगरपालिकाके १ से १९ वडाके भल्मन्साहुकनके सहभागिता रहल रहे । भल्मन्साहुक्रे अब्बे वडाके समस्याबारे योजना बनैटी रहल ओ हलहाली पालिका वा वडामे पेश कैना जनैले बटै ।