आगी लगाके एकल महिलाके हत्या, २ जाने पक्राउ

दार्चुला, २५ जेठ । दार्चुलामे आगी लगाके एकल महिलाके हत्या हुइल बा । शैल्यशिखर नगरपालिका १ बारिलके ४० वर्षीया अनिभा खडायतके आगी लगाके हत्या हुइल प्रहरी जनैले बा ।

घर लग्गे कुह्याइल खरमे आगी लगाके महिलाके हत्या हुइल जानकारी आइल जिल्ला प्रहरी कार्यालय दार्चुलाके डिएसपी प्रतीक विष्ट जानकारी डेलै । घटनाके अनुसन्धानके लाग प्रहरी चौकी बलाँच, इलाका प्रहरी कार्यालय गोकुलेश्वरसे टोली परिचालन करल बा । जरल अवस्थामे खडायतके शव मंगरके रात फेला परल ओ अपनेहुक्रे प्रहरीहे खबर करल शैल्यशिखर नगरपालिका वडा नम्बर १ के वडाअध्यक्ष भरतबहादुर खडायत जानकारी डेलै ।

महिलाके गोसिया ७–८ बरस पहिले निधन होसेकल बा । मृतकके २ छाइ ओ १ छावा रहल बटिन् । अनुसन्धानके लाग प्रहरी गाउँके बीरेन्द्र खडायत ओ तुला खडायतहे पक्राउ करल विष्ट बटैलै ।