उखरमाउलो गर्मी बह्रलपाछे विद्यालयमे विदा
पहुरा समाचारदाता
धनगढी, २६ जेठ । उखरमाउलो गर्मी बह्रलपाछे टमान पालिकासे विद्यालयहे गर्मी विदा डेना निर्णय करले बा ।
कैलालीके गोदावरी नगरपालिकासे विद्यालयमे यिहे २६ गतेसे ३१ गतेसमके लाग नगरमे रहल सक्कु विद्यालय बन्द कैना निर्णय करले हो । अत्याधिक गर्मी बह्रलपाछे नगरपालिकाके विद्यालयहे ६ दिन विदा देना निर्णय हुइल शाखा अधिकृत प्रयागराज जोशी बटैलै ।
बुधके एक सुचना जारी करटी नगरपालिकासे अत्याधिक गर्र्मीके कारण ३१ गतेसमके लाग नम्मा विदासे मिलान हुइना करके विद्यालय बन्द कैना निर्णय करले बा ।
ओस्टेक करके घोडाघोडी नगरपालिकाफे यिहे जेठ २६ ओ २७ गते दुई दिन विद्यालयमे विदा डेना निर्णय करले बा । निमित्त प्रमुख प्रशासकीय अधिकृत कैलाश कुमार रावत नगरपालिका भिटरके सक्कु विद्यालयहे दुई दिन गर्मी विदा डेना निर्णय हुइल जनैलै । ओस्टेक करके अत्याधिक गर्मी बढलपाछे कञ्चनपुरके तीन पालिकाफे विद्यालय बन्द करैले बटै ।
भीमदत्त नगरपालिकासे जेठ २३ गते मंगरसे शुकसम विद्यालय बन्द करैना निर्णय करल रहे । भीमदत्तके निर्णयपाछे वेदकोट ओ बेलडाँडी गाउँपालिकासेफे विद्यालय बन्द कैना निर्णय करले बटै । भीमदत्तमे चार दिन ओ और दुई तहमे तीन दिनके लाग विद्यालय बन्द करल बटै । बेदकोट नगरपालिकाके प्रमुख प्रशासकीय अधिकृत पदमराज भट्ट अत्यधिक गर्मीसे पठनपाठनमे प्रतिकूल असर विल्गाई लागलपाछे विद्यालय बन्द करल बटैलै ।
तीन तह बाहेक और तहमे भर विद्यालय बन्द नइकरके पठनपाठन जारी राखल बा । उ तहमे सामुदायिक ओ संस्थागत दुनु विद्यालय सञ्चालनमे बटै ।
गर्मीमे विद्यालय बन्द नइकैना स्थानीय तहमन्से कुछमे शैक्षिक क्षेत्रसे जोरल व्यक्ति प्रमुख बटै । दोधारा चाँदनी नगरपालिका, कृष्णपुर नगरपालिका ओ पुनर्वास नगरपालिकामे शैक्षिक क्षेत्रसे जोरल व्यक्ति प्रमुख बटै । पुनर्वासके मेयर तोय प्रसाद शर्मा शिक्षण पेशासे अवकाश पाके सक्रिय राजनीतिमे आइल हुइट ।
स्थानीय तह निर्वाचनमे उहाँ मेयरमे निर्वाचित हुइल हुइट । २०७४ के निर्वाचनमे उहाँ पराजित हुइल रहिट । शिक्षण पेशासे आइल शर्मा फे गर्मीमे विद्यालय बन्द नइकुरके पठनपाठनहे निरन्तरता डेले बटै ।
कृष्णपुर नगरपालिका मेयर हेमराज ओझा ओ दोधारा चाँदनी नगरपालिकाके मेयर किशोर कुमार लिम्बु दुनु जाने संस्थागत विद्यालयके सञ्चालक हुइट । कृष्णपुरके ओझा धनगढीमे स्कुल सञ्चालन करटी आइल बटै । और स्थानीय तहमे अत्यधिक गर्मीसे विद्यालय बन्द हुईबेरफे ओझा ओर ध्यान नइडेहल हुइट ।
दोधारा चाँदनीके लिम्बुफे शिक्षण संस्था सञ्चालन करटी रहल बटै । शुक्लाफाँटा नगरपालिका, बेलौरी नगरपालिका ओ लालझाडी गाउँपालिकामेफे विद्यालय बन्द नइकरके पठनपाठन सञ्चालन करल बा ।
नेपाल राष्ट्रिय शिक्षक संगठनके केन्द्रीय सदस्य भवानी चन्द अत्याधिक गर्मीके कारण विद्यालय बन्द कैना मजा रहल बटैलै । ‘यैसिन गर्मीमे पढाई नइसेक्जाई, विद्यालय लगाके फे फाइदा नइहो’ उहाँ कहलै, ‘पानी नइपरटसम विदा डेलेसे मजा हुई ।’
ढेर विद्यार्थी ओ टिनके छाना हुइल विद्यालयमे गर्मीके कारण पठनपाठन करे सेक्ना अवस्था नइहुइल केन्द्रीय सदस्य चन्द बटैठै । ‘लेण्टर रहल, विजुली बत्ती पुगल, कम विद्यार्थी रहल विद्यालयमे टे ठोर ठोर सहज हुई’ उहाँ बटैलै ।
स्थानीय तहसे नम्मा विदासे कटौती हुइना गर्मीमे विदा डेहल हुइट । शैक्षिक क्यालेण्डर अनुसार ४५ दिनके नम्मा विदा रहठ । विद्यालय असार वा सावनमे नम्मा विदा डेना करल बटै । उहे नम्मा विदासे कटौती हुइना करके जाडो विदाफे डेना करल बा ।
