गौरीगंगामे बालविवाह अन्त्य कैना कार्य योजना निर्माण
पहुरा समाचारदाता
चौमाला, २६ जेठ । कैलालीके गौरीगंगा नगरपालिकामे बालविवाह अन्त्य सम्बन्धी दुई दिने कार्य योजना निर्माण गोष्ठी करल बा । सुदूरपश्चिम प्रदेश सरकार, सामाजिक विकास मन्त्रालय, शिक्षा विकास निर्देशनालय, सामाजिक विकास कार्यालय, कैलालीके आयोजनामे गोष्ठी करल हो ।
बालविवाह अन्त्य कैना नगर, वडा, समुदाय विद्यालय ओ अभिभावक समेटके जीवन उपयोगी शिक्षा, यौन प्रजनन स्वास्थ्य तथा समाज रुपान्तरणमे बालबालिका किशोरकिशोरी मैत्री सम्बन्धके अइना बर्षमे नगरपालिकासे संचालन करे पर्ना योजनाके बजेट तर्जुमा कैना आघे करल कार्यक्रमसे बालबालिकाके सवालमे नगरपालिकाहे जिम्मेवार बनैना सहयोग पुगल नगर महिला शाखा प्रमुख भावना जोशी जानकारी डेले बटै ।
सामाजिक विकास कार्यालय कैलाली प्रमुख कुलराज सोतीके अध्यक्षतामे सम्पन्न हुइल गोष्ठीमे गौरीगंगाके प्रमुख प्रशासकीय अधिकृत हरिदत्त भट्टके वडका पहुनामे हुइल कार्यक्रमके सहभागी शिक्षिका गिता सापकोटा बालबालिकाके क्षेत्रमे गोष्ठीसे तय करल योजनाके कार्यान्वयनके अपेक्षा करल बटैली ।
विद्यालयके शिक्षिका, महिला स्वास्थ्य स्वयंसेविका बाल अधिकारके क्षेत्रमे कार्यरत संस्थाके प्रतिनिधि, प्रहरी तथा बालबालिकाहुकनके सहभागितामे गौरीगंगामे अइना वर्ष संचालन करे पर्ना कार्य योजना निर्माण करल बा । दुई दिन संचालन हुइल गोष्ठीमे गौरीगंगाके उप सचिव हरिश पन्त ओ कानुन अधिकृत जयन्त ठकुल्ला सहजीकरण करल रहिट ।
