बेहडाबाबा धार्मिकस्थलमे दर्शनार्थीके भीड

पहुरा समाचारदाता
धनगढी, २६ जेठ । कैलालीके प्रसिद्ध धार्मिकस्थल बेहडाबाबा मन्दिरमे दर्शनार्थीके भीड लागल बा । गंगादशहराके अवसरमे बेहडाबाबाके दर्शन, पूजाआजा कैना ओ मेला खेलुइयनके भीड लागल हो ।

धनगढी उपमहानगरपालिका–१६ स्थित रामपुर गाउँमे रहल बेहडाबाबा मन्दिर नेपाल–भारतके दर्शनार्थीहुक्रनके आस्थाके धरोहरके रुपमे रहल बा । डुनु देशके दर्शनार्थीहुक्रे बेहडाबाबाके दर्शन कैटी आइल बाटै ।

गंगादशहराके दिन बिफेक रोज दिनके किल करिब ४० हजार दर्शनार्थी बेहडाबाबा मन्दिरके दर्शन करल वडा नम्बर १६ के वडा अध्यक्ष रामलाल चौधरी बटैलै ।

‘नेपाल–भारत डुनु देशके दर्शनार्थीहुक्रनके उल्लेख्य रुपमे आउजाउ हुइटी रहल बा,’ उहाँ कहलै, ‘गंगादशहरा मेलाहे व्यवस्थित कैना ओ शान्ति, सुरक्षा कायम कैना मेला क्षेत्रहे मदिरा निषेधित क्षेत्र बनाइल बा ।’

ओस्टके, दर्शनार्थीहुक्रनके सुरक्षाके लाग पर्याप्त मात्रामे सुरक्षाकर्मी परिचालन करल मेला व्यवस्थापन समिति जनैले बा । चार दिनसम गंगादशहरा मेला आयोजना हुइना वडा अध्यक्ष चौधरी बटैलै । उहाँ शुकसम दर्शनार्थीके भीडभाड रहना बटैलै ।

बेहडाबाबा मन्दिरके दर्शनके लाग भारतके उत्तर प्रदेशके टमान ठाउँसे भारतीय दर्शनार्थी अइना करठै । बेहडाबाबा मन्दिरके दर्शन कैनासे पुत्र, पत्नी, धन प्राप्त हुइना करल विश्वास रहल बा । आघेक दुई बरस कोरोना महामारीके कारण भारतीय तिर्थालु आइ पाइल नैरहिट । इ बरस ढिउर संख्यामे दर्शनार्थीके भीड रहल बा ।

बेहडाबाबा मन्दिरके गाथा भगवान शिवसँग जोरल बा । बेहडाबाबाके दर्शन कैके माग चिज पूरा हुइना जनविश्वास रहटी आइल बा । भगवान शिवके प्रतीकके रुपमे रहल नेपालके पशुपतिनाथ ओ भारतके केदारनाथ जत्रा बेहडाबाबाके धार्मिक महत्व रहल विश्वास करजाइठ् ।

प्रचण्ड गर्मीमे गौरीफन्टा नाकासे बेहडाबाबा मन्दिरसम प्रायः पैदल नेंगके भारतीय दर्शनार्थीहुक्रे पुग्ना करल बाटै । कतिपय दर्शनार्थी आपन मनोकामना पूरा हुइल बात साइनबोर्डमे लिखके बेहडाबाबा मन्दिर आसपास रहल रुखमे टस्ना करल बाटै ।

किवंदन्तीअनुसार कौनो समय बनुवा बनुवै रहल हालके बेहडाबाबा मन्दिर क्षेत्रमे गोठ बनाके भारतीय गोठालाहुक्रे गैयाभैस चह्राइक लाग वहाँ बैठिट् । बेहडाबाबामे गोठ बनाके गैयाभैस चरुइया भारतके सिङ्गाहीस्थित कन्हैया अहिर कना गयरुवाके गैया बच्चा पाइलपाछे उ दूध डेहे । बच्चा पाइल गैया हरेक दिन दूध नैडेहलपाछे दिनके गैयाक पाछे पाछे जाके कन्हैया गैया दूध नैडेहल रहस्य पत्ता लगाइल रहिट ।

उ आपन गैयाहे एक ठाउँमे दूध चुहाइट दृश्य डेख्लै । ओकरपाछे उहे कन्हैया गैया दूध चुहाइल ठाउँमे कोरेबर शिवलिंग फेला परल निवर्तमान वडा अध्यक्ष लक्ष्मीनारायण चौधरी बटैलै । ओइसीक बेहडाबाबा मन्दिरके सम्बन्ध परापूर्वकालसे भारतसँग जोरल ओरसे फेन भारतीय श्रद्धालु पूजाआजाके लाग यहाँ ढिउर अइना करल बटाजाइठ् ।