गोदावरीमे नवनिर्मित कैवल्यनाथ मन्दिरके उद्घाटन

पहुरा समाचारदाता
धनगढी, २६ जेठ । कैलालीके गोदावरी धाममे नवनिर्मित कैवल्यनाथ मन्दिर (मोक्षद्वार) के उद्घाटन हुइल बा ।

मन्दिरमे स्थापना करल पञ्चमुखी शिवलिंगके एक समारोहकाबीच बिफेक रोज १००८ स्वामी लोकानन्द माहाराज प्राण प्रतिष्ठा करले रहिट । मन्दिरके पुरान कलात्मक शैलीमे निर्माण करल बा ।

संघीय सरकारके शहरी विकास कार्यक्रमके सहयोगमे उपभोक्तामार्फत २०७३ से मन्दिर निर्माण सुरु हुइल रहे ।

ढेड करोड ढेरके लगानीमे मन्दिर निर्माण हुइल गोदावरी धाम विकास समिति जनैले बा । गोदावरी धाम विकास समितिके अध्यक्ष पदमराज जोशी मन्दिर निर्माण हुइलसँगे यी क्षेत्रमे धार्मिक पर्यटन बह्रना विश्वास व्यक्त करले बटैं ।