सुदूरपश्चिमके प्रदेश प्रमुख ओ प्रदेश २ के पूर्व प्रमुखबीच भेटवार्ता

पहुरा समाचारदाता
धनगढी, २८ जेठ । सुदूरपश्चिमके प्रदेश प्रमुख देवराज जोशी ओ प्रदेश नम्बर २ के पूर्व प्रदेश प्रमुख राजेश अहिराजबीच भेटवार्ता हुइल बा । प्रदेश प्रमुख जोशीके धनगढीस्थित आवासमे डुनु जनहन बीच भेटवार्ता हुइल हो ।

डुनु जनहनबीच समसामयीक विषयमे बातचित हुइल बा । तीन दिनसे सुदूरपश्चिमके भ्रमणमे रहल अहिराज कञ्चनपुरके शुक्लाफाँटा राष्टिय निकुञ्ज, थारु बस्ती ओ दोधारा चाँदनीके भ्रमणपाछे प्रदेश प्रमुख जोशीसँग भेट करल हुइट ।

भेटमे अहिराज शुक्लाफाँटा बन्यजन्तु आरक्ष हुइल बेला, वहाँसे विस्थापित हुइल नागरिक अब्बेसम ढिउर पीडित रहल ओरसे उ विषयमे सरकारके ध्यानाकर्षण करैना आग्रह करलै । शुक्लाफाँटाके क्षेत्रफल बह्रल बेला २०५० सालमे वहाँ १८ सय परिवार विस्थापित हुइल रहिट । सरकारसे उहाँहुक्रनहे औरे ठाउँमे जग्गा डेना कहलपाछे अब्बेसम पैले नैहुइट ।

ओस्टके अहिराज महाकाली पारके गाउँ दोधारा चाँदनीके बासिन्दाके फेन सीमाका समस्याके बारेम प्रदेश प्रमुख जोशीहे जानकारी करैलै । दोधारा चाँदनीमे ढिउर मनैनके हातमे जग्गाधनी प्रमाण पुर्जा रलेसे फेन उहाँहुक्रे जग्गा चलनभोग करे नैपाइल समस्या सुनैलै । कञ्चनपुरमे सीमानाके समस्या रहल ओरसे इ बारेम प्रदेश सरकार ओ राष्ट्रपतिके कार्यालयहे जानकारी करैना फेन अहिराज आग्रह करलै । प्रदेश प्रमुख जोशी ८ महिना आघे प्रदेश प्रमुखमे नियुक्त हुइल हुइट ।