कैलालीमे हावाहुरीले टमान घरमे क्षति
पहुरा समाचारदाता
धनगढी, २८ जेठ । कैलालीमे आइल हावाहुरीके कारण टमान घरमे क्षति पुगल बा । कुछ पशुचौपाया समेतके मृत्यु हुइल बा ।
शनिच्चर साँझ आइल हावाहुरीके कारण भजनी नगरपालिका–४, झलझलिया शिविरके करिब १ दर्जन घरमे क्षति हुइल बा । ओस्टेक कैलारी गाउँपालिकामे दर्जन ढेर घरमे क्षति पुगल बा ।
कुछ घरमे सालके रुख समेत गिरल बा कलेसे कुछके टिन ओ खरके छप्रा फेन उरल बा । कैलारी गाउँपालिका–८, पृथ्वीपुरके सागर चौधरी अपन घरके छप्रना उरल जानकारी डेलैं । मानवीय क्षति भर नैहुइल जिल्ला प्रहरी कार्यालय कैलाली जनैले बा ।
लम्मा समयसम पानी नैपरल कारण कैलालीसहित तराईके जनजीवन गर्मीले प्रभावित हुइल रहे । शनिच्चर हल्का हावाहुरिसहित आइल पानीले कुछ राहत हुइल बा । अत्यधिक गर्मी हुइलओरसे विद्यालयमे पठनपाठनसमेत प्रभावित हुइल बा । कैयौं विद्यालय कुछ दिनके लाग बन्द हुइल बा ।
स्थानीय वायु ओ पूर्व–पश्चिमी न्यून चापिय रेखाके प्रभावसे हावाहुरीसहित बादलके विकास हुइल मौसम पूर्वानुमान महाशाखा जानकारी डेले बा । कैलालीमे हुइल वर्षा मनसुनी नैरहल ओ सुदूरपश्चिममे मनसुन पुग्न अभिन कुछ दिन लग्ना विज्ञहुकनके कहाइ बा ।
