कैलारीमे सम्पन्न योजनाके अनुगमन

पहुरा समाचारदाता
धनगढी, २८ जेठ । कैलारी गाउँपालिका स्तरीय अनुगमन समितिसे गाउँपालिकामे निर्माण सम्पन्न हुइल योजनो अनुगमन करल बा ।

गाउँपालिका उपाध्यक्ष तथा अनुगमन समिति संयोजक भगवती कुमारी चौधरीके नेतृत्वमे प्रदेश ओ गाउँपालिकाके बजेटमे निर्माण सम्पन्न हुइल योजनाके अनुगमन करल हो । वडा–९ ममे सुपरमुन यूवा क्लव भवनके अनुगमन करल बा । यी भवन निर्माणके लाग गैल बर्ष ६ लाख ओ यी बर्ष ६ लाख ३० हजार करके १२ लाख ३० हजार बजेट छुटयाइल रहे ।

गाउँपालिकाके बजेटमे वडा–१ रानामुडामे लागत साझेदारी भवन निर्माणके अनुगमन करल बा । यी भवनके काम बजेट अनुसार वालसमके काम सम्पन्न हुइल बा । ओस्टेक करके वडा नम्बर ८ मे अधुरो रामजानकी धर्मशाला भवनके अनुगमन करल बा । जेकर लाग ९ लाख ५० हजार बजेट विनियोजन करल रहे । यकर काम बाँकी रहल ओरसे हालहाली सम्पन्न कैना सुझाव डेहल बा ।

ओस्टेक करके अनुगमन समितिसे कुट्टी टोल झोलुङे पुल लग्गे भौतिक तटबन्ध (१० लाख बजेट), वडा नम्बर ४ नवलपुर सभा हल भवनके अनुगमन करल बा । २० लाख बजेटमे निर्माण हुइल उ भवनमे ढोकाके पल्ल लगैना बाँकी रहल बा ।
प्रदेश पूर्वाधारके १० लाख ३ हजार बजेट अन्र्तगत वडा नम्बर ८ लौशा गाउँमे सम्पन्न सडक ग्राभेल ओ १५ लाख बजेटमे दुधिया गाँउमे सडक स्तरोन्नतीके अनुगमन करल बा । यहाँ माटीक डेनसिटी नापके ग्राभेलिङके काम हुइटी रहल बा । यिहीहेफे हाली सम्पन्न करे पर्ना समितिसे सुझाव डेहल अनुगमन सदस्य सचिव तथा योजना शाखा प्रमुख सन्तोष कुमार चौधरी बटैलै ।

प्रदेश पूर्वाधार बजेट अन्र्तगत १९ लाख ४५ हजारमे बजेटमे वडा नम्बर ९ उत्तर टोलमे रहल शिवशक्ति आधारभुत विद्यालयके पक्की पर्खाल ओ गेट निर्माण हुइटी रहल बा । यहाँ पाँच मिटर पर्खाल ओ गेट निर्माणके काम बाँकी बा । यिहीहेफे समितिसे हाली काम सम्पन्न कैना सुझाव डेहल बा ।

देवीगंज–समारचौरा हुइटी सिमरनासम सडका स्तरोन्नतीके काम सम्पन्न हुइल बा । ३३ लाख बजेट रहलमे ३० लाख तराई मधेशके बजेट ओ ३ लाख गाँउपालिकाके बजेट रहल रहे । घुराह लडियक दक्षिण भगतपुरमे शेरबहादुर परियारके घरसम डयाम निर्माण वडाके बजेट ओ प्रधानमन्त्री स्वारोजगार बजेट करके १० लाख ८८ हजार ७४१ योजनाके सम्पन्न हुइल बा ।
गाउँपालिका स्तरीय अनुगमन टोलिमे संयोजक भगवतीकुमारी चौधरी, पूर्वाधार विकास समिति संयोजक प्रेमबहादुर चौधरी, अनुगमन सदस्य सचिव तथा योजना शाखा प्रमुख सन्तोष कुमार चौधरी, अनुगमन समिति सदस्य सुनिला चौधरी, सव इन्जिनियर सुनिल चौधरी, सवओभरसियर निर्मल चौधरी लगायतको उपस्थिित रहल रहिट ।