‘राजनीतिक चेतनाके बिया बोउइया योद्धा जोखन’
पहुरा समाचारदाता
धनगढी, २९ जेठ । कैलालीके कैलारी गाउँपालिकाके स्वर्गीय जोखन रत्गैंया विराट प्रतिभाके धनी व्यक्तित्व रहल एक कार्यक्रमके सहभागीहुक्रे बटैले बाटै ।
अँट्वारके रोज सहिद जोखन रत्गैंया चौधरी (हिम्मत) स्मृति प्रतिष्ठान कैलालीसे आयोजित श्रद्धाञ्जली तथा सहिद परिवारहे सम्मान कार्यक्रमके वक्ताहुक्रे ओइसीन बटाइल हुइट ।
कार्यक्रममे नेकपा माओवादी केन्द्रके सुदूरपश्चिम प्रदेश इन्चार्ज खगराज भट्ट सहिद जोखन रत्गैंया एक विराट प्रतिभाके धनी व्यक्तित्व रहल बटाइल रहिट । उहाँ १० बर्षे ऐतिहासिक महान जनयुद्धके दौरानमे विराट प्रतिभाके धनी व्यक्तित्वहे गुमाइ पुगल बटैलै । जोखन एक सांस्कृतिक, न्यायिक, बैचारिक, एकता लगायत सर्वाङ्गीन मान्यता बोकल समाजमे राजनीतीक चेतनाके बिया बोउइया योद्धा रहल इन्चार्ज भट्ट बटाइल रहिट ।
जोखनके कारण आज थारु समुदायमे राजनीतिकसे लेके आर्थिक सामाजिक चेतना आइलके साथे आपन हकअधिकारके लाग बोले सेक्ना व्यक्तित्व विकास समेत हुइल उहाँ बटाइल रहिट । कलेसे सहिद हुइल सक्कु योद्धाहुक्रनके डेखाइल डगरामे नेंग्ना फेन उहाँ औंल्याइल रहिट ।
कार्यक्रममे सुदूरपश्चिम प्रदेशके मुख्यमन्त्री त्रिलोचन भट्ट जोखन रत्गैंया सामाज रुपान्तरण तथा अधिकारके लागि महत्वपूर्ण योगदान पुगाइल बटाइल रहिट । १० वर्षे जनयुद्धमे उहाँक जैसिन सहिदहुक्रनसे खेलल् महत्वपूर्ण भूमिकाके कारण अब्बे आदिवासी जनजाति थारु समुदाय लगायत दलित विपन्न समुदायमे राजनैतिक स्तर उप्पर उठल बटैलै ।
प्रदेश सभा सदस्य बीरमान चौधरी केन्द्र तथा प्रदेश सरकार सहित जोखन रत्गैंया लगायत दशवर्षे जनयुद्धमे सहादत प्राप्त सहिद तथा सहिद परिवारके लाग कौनो फेन नमूना काम नैकरे सेकल बटाइल रहिट । सहादत प्राप्त व्यक्तित्व तथा परिवार राष्ट्रके सम्पत्ति रहल ओरसे ओइनके परिवारहे शिक्षा स्वास्थ्यसे लेके सक्कु क्षेत्रमे सरकारसे विशेष ध्यान डेहे पर्ना बटाइल रहिट ।
कार्यक्रममे थाकस कैलालीके कार्यवाहक सभापति माधव चौधरी स्वर्गीय रत्गैंया थारु समुदायके एक धरोहर रहल बटाइल रहिट । उहाँ थारु समुदायके उत्थानके लाग आर्थिक, सामाजिक, राजनैतिकसे लेके शैक्षिक स्तरमे महत्वपूर्ण भूमिका खेलल् बटाइल रहिट ।
सहिद जोखन रत्गैंया चौधरी (हिम्मत) २०५९ जेठ २९ गते कैलालीके भजनीमे सहादत प्राप्त करल रहिट । कार्यक्रम प्रतिष्ठानके कैलाली अध्यक्ष हरिराम चौधरी उत्सवके अध्यक्षतामे हुइल रहे कलेसे कार्यक्रमके सञ्चालन प्रतिष्ठानके सचिव तिलक चौधरी करले रहिट ।
