नेपाली कांग्रेस ओ एमालेके नेता नागरिक उन्मुक्तिमे प्रवेश

पहुरा समाचारदाता
धनगढी, २९ जेठ । नेपाली कांग्रेस महासमिति सदस्य अरुण चौधरी लगायतके नेताहुक्रे नागरिक उन्मुक्ति पार्टी प्रवेश करले बटै । सदस्य अरुण, जानकी गाउँपालिकाके निवर्तमान अध्यक्ष प्रदीप चौधरी लगायतके नेताहुक्रे उन्मुक्ति पार्टीमे प्रवेश करल हुइट ।

आघेक स्थानीय तहके निर्वाचनमे फोरम लोकतान्त्रिकसे प्रदीप चौधरी गाउँपालिके अध्यक्षमे निर्वाचित हुइल रहिट कलेसे लम्की चुहाके मेयरमे अरुण चौधरी झिनो मतसे पराजित हुइल रहिट । कांग्रेससँगके एकतापाछे उहाँ प्रदेश सभा सदस्यमे फेन झिनो मतसे पराजित हुइल रहिट । १४ औँ जिल्ला अधिवेशनमे उहाँ महासमिति सदस्यमे निर्वाचित हुइल रहिट । उहाँ सर्वाधिक मत लनुइयामे डुसरा स्थानमे रहिट ।

ओस्टके नेकपा (एमाले) के केन्द्रीय निर्वाचन आयोगके पूर्व सदस्य केवालाल चौधरी ओ नेता लालबीर चौधरी नागरिक उन्मुक्ति पार्टीमे प्रवेश करले बाटै । केवालाल नेकपा (एमाले) से निर्वाचित होके साविक प्रतापपुर गाविसके अध्यक्ष निर्वाचित हुइल रहिट ।

रेशमलाल चौधरीके बाबा लालबीर चौधरी २०७४ सालके निर्वाचननमे कैलाली क्षेत्र नम्बर १ (क) से नेकपा (एमाले) के ओरसे प्रदेश सभा सदस्यके उम्मेदवार बनल रहिट । नवप्रवेशीहे नागरिक उन्मुक्ति पार्टीके केन्द्रीय अध्यक्ष रञ्जिता श्रेष्ठ स्वागत करल रही ।