कार्यक्रमके प्रगति तथा सार्वजनिक सुनुवाई कार्यक्रम हुइल
पहुरा समाचारदाता
हसुलिया, ३० जेठ । व्याकवार्ड सोसाइटी एजुकेसन (बेस) कैलालीके परियोजना अन्तर्गत तमान कार्यक्रमके प्रगतिमुलक सार्वजनिक सुनुवाई कार्यक्रम हुइल बा ।
कैलारी गाउँंपालिका वडा नम्बर ४ मे सोम्मारके एक कार्यक्रम कैके सुनुवाई कार्यक्रम हुइल हो । बेससे संचालित कोभिड १९ से प्रभावित सामुदाय ओइनके लग पुनरोत्थान परियोजना कार्यक्रम कैलाली जिल्लाके धनगढी उपमहानगरपालिका, गोदावरी नगरपालिका ओ कैलारी गाउँपालिकामे कार्यक्रम लागू कैले रहे ।
लुथरन विश्व रिलिफके आर्थिक सहयोग, कैलारी गाउँपालिकाके समन्वय ओ व्याकवार्ड सोसाइटी एजुकेसन (बेस) कैलालीके आयोजनामे कैलारी गाउँपालिकामे वडा नम्बर १,२,४ ओ ७ मे कार्यक्रम लागू कैगैल रहे ।
कार्यक्रममे वडा नम्बर ४ के वडा अध्यक्ष ठागुराम चौधरी स्थानिय ओइनहे कृषि व्यवसायमे लागल कृषक ओइनहे धन्यवाद ओ सफलताके कामना व्यक्त कर्ले रहिंट ।
उहाँ कहलैं, कृषि एकठो मजा पेशा हो । एम्ने जाँगर लगाके कैलेसे मेहनत खेर कहुँ नैजाइठ । ओहेमारे सकारात्मक सोंच लेके काम कर्लेसे हर काममे आघे बर्हे सेक्ना बटैलैं ।
ओस्टेके कैलारी गाउँपालिकाके स्वास्थ्य शाखाके प्रमुख वीरेन्द्र सापकोटा सहभागी हुइल सहभागीनहे सफलताके सुभकामना डेलैं । उहाँ कहलैं, तीन तीन चो कोरोनाके महामारी सटाइल ओर्से फेन अपन सेकलसम धेर काम करल बटैलैं ।
सार्वजनिक सुनुवाई कार्यक्रममे बेसके जिल्ला संयोजक लक्ष्मण चौधरी सहजीकरण कर्ले रहिंट कलेसे वडा नम्बर १,२,४ ओ ७ के कृषक ओइनके सहभागी हुइल रहे ।
