मानवअधिकार सहायता कक्ष संजालसे हिंसा पीडितहे सहयोग
पहुरा समाचारदाता
धनगढी, ३० जेठ । मानवअधिकार सहायता कक्ष संजालसे घरेलु तथा सामाजिक हिंसामे परल तीन जाने पीडितहुकनहे आर्थिक सहयोग करले बा ।
इन्सेक कार्यालयसे गठित मानवअधिकार सहायता कक्ष संजाल डिसिएके आर्थिक सहयोगमे से घरेलु तथा सामाजिक हिंसामे परल तीन जाने पीडितहुकनहे आर्थिक सहयोग करल हो ।
संजालसे पुनर्वास नगरपालिका कञ्चनपुरके निर्मला चौधरी, मोहन्याल गाउँपालिका कैलालीके मनसरा भुल ओ लम्कीचुहा नगरपालिका कैलालीके जनपुरा देवकोटा (जैसी)हे आर्थिक सहयोग डेहल हो ।
घरेलु तथा सामाजिक हिंसामे परल तीन जाने पीडितहुकनहे जनही १० हजारके दरसे आर्थिक सहयोग करल हो । संजालसे घरेलु तथा सामाजिक हिंसामे परल आर्थिक अवस्था कम्जोर व्यक्तिहुकनके अवस्था हेरके सहयोग करटी आइल इन्सेक प्रदेश संयोजक खडकराज जोशी बटैलै ।
ओस्टेक करके मानव अधिकार सहायता कक्ष व्यवस्थापनके लाग राष्ट्रिय मानव अधिकार आयोगको प्रकृति सिंह ओ इन्सेक प्रदेश कार्यालयके प्रलेख अधिकृत कृष्ण विक हे जिम्मेवारी डेहल बा ।
संजालसे जनसरोकारके विषय रहल बह्रटी गैल महंगी, किसानहुक्रे मल नइपाइल ओ मनसुन सुरु हुइल ओरसे विपत व्यवस्थापनके पूर्व तयारीबारे छलफल करल रहे । कार्यक्रम संजालके अध्यक्ष देवी प्रसाद खनालके अध्यक्षतामे हुइल रहे ।
