गेटा मेडिकल कलेज सञ्चालनके दवाव स्वरुप स्वास्थ्य शिविर

पहुरा समाचारदाता
धनगढी, ०१ असार । कैलालीके गोदावरी नगरपालिकामे निर्माणाधिन गेटा मेडिकल कलेज सञ्चालनके लाग स्थानीय निरन्तर दवावमे बटैं । मंगरके रोज मेडिकल सञ्चालनार्थ संघर्ष समिति निःशुल्क स्वास्थ्य शिविर सञ्चालन करले बा ।

गेटा मेडिकल विश्वविद्यालय संचालनार्थ संघर्ष समिति अत्तरियाले निःशुल्क स्वास्थ्य शिविर संचालन करल हो । शिविरमे टमान रोगके विशेषज्ञ डाक्टर सेवा डेलैं । मेडिकल कलेजके गेटमे टमान अस्पतालके सहयोगमे शिविर सञ्चालन करल हो । सरकारसे मेडिकल कलेज संचालनके लाग ढिलाइ करना आशंका रहल ओरसे स्थानीय निरन्तर आन्दोलनमे बटैं ।

संघर्ष समितिके संयोजक लोकराज पान्डेय आब मेडिकल विश्वविद्यालय बनैना कहिके मोडालिटी समेत प्रष्ट होसेकल ओरसे सरकार तुरुन्ते अस्पताल संचालन करेपरना बटैलैं । उहाँ सरकार यी या उ वहानमे मेडिकल सञ्चालनके लाग ढिलाई करटि आइल बटैलैं । उहाँ प्रधानमन्त्रीहे ज्ञापनपत्र बुझाके थप ध्यानाकर्षण करैना बटैलैं । असार ४ गते प्रधानमन्त्री शेरबहादुर देउवाके धनगढी अइना कार्यक्रम रहल ओरसे ओहे दिन ज्ञापनपत्र बुझैना उहाँ बटैलैं ।

संघर्ष समितिके उपसंयोजक आनन्द भट्ट अस्पताल सञ्चालन नैहुइटसम आन्दोलन जारी रहना बटैलैं । गेटा मेडिकल कलेजहे यथाशिघ्र सञ्चालन करेपरना कटि निःशुल्क स्वास्थ्य शिविर करल बा । पदमा, माया मेट्रो, सुदूरपश्चिमाञ्चल सामुदायिक अस्पताल, गोदावरी पोलिक्लिनिक लगायत संस्थाके सहयोगमे गेटा मेडिकल विश्वविद्यालय सञ्चालनार्थ संघर्ष समिति विश्वविद्यालयके गेटमे मंगरके रोज उ शिविर करल हो ।

निर्माणाधिन गेटा मेडिकल कलेजके भौतिक संरचना तयार होसेकल बा । सरकार यिहिनहे सञ्चालनमे नन्नाभर ध्यान नैडेहल कटि टमान चरणमे संघर्षके कार्यक्रम जारी बा । यीआघे हस्ताक्षर अभियानसँगे राजमार्ग अवरुद्ध, प्रमुख जिल्ला अधिकारीमार्फत प्रधानमन्त्रीहे ज्ञापनपत्र लगायतके संघर्षके कार्यक्रम हुइल रहे ।

पूर्वाधार निर्माण कार्य ९० प्रतिशत

३५ वर्ष पहिले सुदूरपश्चिममे मेडिकल कलेज सञ्चालनके काम आघे बह्रलेसे फेन अभिनसम उ पूर्णता पाइ सेक्ले नैहो । २०४४ सालमे मेडिकल कलेज बनैना कटि जग्गा किनल शंकराचार्य २०५६ मे जयन्त सरस्वती स्वर्ण महोत्सव ट्रस्ट स्थापना करलबाद सरकार उ योजनामे सहभागी हुइल । सरकार शंकराचार्यसे स्थापना करल ट्रस्टहे मेडिकल कलेज सञ्चालन करना कटि ओहे ठाउँमे ७७ बिघा जग्गा डेले रहे ।

अब्बे प्रस्तावित गेटा मेडिकल कलेजके लाग भारी भवन निर्माण करल बा । मेडिकल कलेज पूर्वाधार निर्माण विकास समितिके कार्यकारी निर्देशक हेमराज पुजाराके अनुसार मेडिकल कलेजमे पूर्वाधार निर्माणके काम ९० प्रतिशत होसेकल बा । चालू आर्थिक वर्षके भौतिक प्रगति फेन ६० प्रतिशत रहल ओ आयोजनाके कुल प्रगति करिब ९० प्रतिशत हुइल उहाँ बटैलैं । संघीय शिक्षा मन्त्रालयसे निर्माण सुरु करल कलेजके प्रशासनिक भवन, कलेज भवन, छात्राबास लगायत संरचना निर्माणके काम होसेकल बा ।

६ सय शैय्या क्षमताके २ ठो अस्पताल भवन निर्माणके काम होसेकल पुजारा जानकारी डेलैं । यकर साथे अन्य २७ ठो भौतिक संरचना निर्माणके काम फेन होसेकल बा । खानेपानी, अक्सिजन प्लान्ट, फोहोरमैला व्यवस्थापन, ढल तथा पानी निकास, विद्युतके सबस्टेसन निर्माणलगायत काम भर बाँकी बा । अब्बे विद्युतके सवस्टेसन निर्माणके काममे लागल पुजारा बटैलैं ।