सुदूरपश्चिमके बजेट ३६ अर्व ७४ करोड ६४ लाख (पूर्णपाठसहित)

सडक पूर्वाधार, कृषि, शिक्षा, स्वास्थ्यहे विशेष जोड

पहुरा समाचारदाता
धनगढी, १ असार । सुदूरपश्चिम सरकारसे अगामी आर्थिक बरस २०७९/०८० के लाग ३६ अर्व ७४ करोड ६४ लाख ६५ हजार रुपियाँ बजेट विनियोजन करले बा ।

बुधके रोज हुइल सुदूरपश्चिम प्रदेशसभा बैठकमे बजेट प्रस्तुत कैटी आर्थिक मामिला मन्त्री प्रकाश रावल उ बजेट विनियोजन करल बटैलै । जौन बजेटके चालु ओर १२ अर्व २९ करोड ५९ लाख ८४ हजार अर्थात ३३ दशमलव ४६ प्रतिशत ओ पुजिगत ओर २४ अर्व १४ करोड ४७ लाख ६१ हजार अर्थात ६५ दशमलव ७४ प्रतिशत बजेट विनियोजन करल बा ।

ओस्टके अन्तर सरकार वित्तिय हस्तान्तरण ओर १ अर्व ३६ करोड ४९ लाख अर्थात ३ दशमलव ७३ प्रतिशत बजेट विनियोजन करल आर्थिक मामिला मन्त्री रावल बटैलै ।

आर्थिक मामिला मन्त्री रावलसे प्रस्तुत करल बजेटमे कृषि, सडक पूर्वाधार, शिक्षा, स्वास्थ्य लगायतके क्षेत्रहे विशेष जोड डेटी ढिउर बजेट विनियोजन करल बटैलै ।

प्रदेश सरकारसे सडक पूर्वाधारके लाग ५ अर्ब ६० करोड ११ लाख बजेट विनियोजन करल बा । ओस्टके प्रदेश सरकारसे प्रदेशमे १ हजार छ सयठो बोरिङ निर्माण सँगे कृषि तथा सहकारी क्षेत्रके लाग ३ अर्ब १० करोड बजेट विनियोजन करले बा ।

ओस्टके कैलालीके कैलारी गाउँपालिका २ मे बर्सौसे अलपत्र गुरगी सिँचाइ आयोजना ओ गौरीगंगा नगरपालिकास्थित खुरखुरिया सिँचाइ आयोजना सुदूरपश्चिम प्रदेश सरकारसे निर्माण कैना जनाइल बा । ओकर लाग ११ करोड बजेट विनियोजन फेन हुइल बा ।

ओस्टके अगामी आर्थिक बरसके लाग शिक्षा ओर १ अर्ब २३ करोड ७३ लाख बजेट विनियोजन करल बा । शिक्षाके गुणस्तर सुधार, आधुनिक पूर्वाधार निर्माण ओ शैक्षिक जनशक्तिके क्षमता सुधारके लाग प्रदेश प्रमुख शैक्षिक सुधार कार्यक्रम अन्तर्गत उ बजेट विनियोजन हुइल हो ।

ओस्टके अगामी आर्थिक बरसके लाग स्वास्थ्य क्षेत्रके लाग एक अर्ब ६ करोड २६ लाख बजेट विनियोजन करल बा । स्वास्थ्य क्षेत्र ओर प्रदेशमे रहल प्रादेशिक ओ जिल्ला अस्पतालमे सेवा विस्तारके लाग उक्त बजेट विनियोजन करल हो । कलेसे थारु समुदायमे किल डेखगैल सिकलसेल एनिमियाके चेकजाँच तथा औषधीउपचारके लाग धनगढीके सेती प्रादेशिक अस्पताल ओ टीकापुर अस्पतालमेमे निःशुःल्क स्वास्थ्यउपचारके व्यवस्था कैना आर्थिक मामिला मन्त्री रावल बटैलै ।

साथे प्रदेश सरकारसे आगामी आर्थिक वर्ष भित्रे सुदूरपश्चिम स्वास्थ्य विज्ञान प्रतिष्ठान सञ्चालन कैना फेन बजेट वक्तव्य मार्फत जनैले बा ।

प्रदेश सरकारसे पर्यटन क्षेत्रके लाग फेन बजेट विनियोजन करले बा । प्रदेश सकारसे पर्यटकीय क्षेत्र खप्तड लगायतके क्षेत्रके विकास तथा प्रवद्र्धके लाग ३ करोड बजेट विनियोजन करल हो ।

ओस्टके मासु क्षेत्रके विकासके लाग फेन प्रदेश सकारसे ३ करोड बजेट विनियोजन करले बा । प्रदेशभरके मासु तथा मिट पसल सुधार तथा कैलाली, कञ्चनपुरसे मासुजन्य पदार्थ ढुवानी कैना सहजताके लाग प्रदेश सरकारसे कोल्ड रुम तथा कोल्ड चेम्बरके लाग उक्त बजेट विनियोजन करल जनैले बा ।

ओस्टके संचार क्षेत्रके लाग फेन प्रदेश सरकारसे १ करोड २० लाख बजेट विनियोजन करल जनैले बा ।

आम संचार एवं पत्रकारीता क्षेत्रके क्षमता विकास, मिडिया सेन्टरके भवन मिर्माण, पत्रकार महासंघ अछाम ओ बझाङके भवन निर्माण, एफ एम रेडियोहे पुँजीगत अनुदान, पत्रकारके स्वास्थ्य उपचारके लाग अक्षयकोष स्थापना, लोक कल्याणकारी विज्ञापनके लाग उक्त रकम विनियोजन करल हो ।

बाढपहिरोसे प्रभावित क्षेत्रके लाग १ अर्ब १२ करोड बजेट विनियोजन करल आर्थिक मामिला मन्त्री रावल जानकारी डेलै । गैल बरस बाढ पहिरोसे प्रभावित क्षेत्रके लाग विशेष बजेट विनियोजन करल हो । गैल बरस वर्षासे टमान संरचनमे क्षति पुगाइल कहटी उ संरचनाके एकीकृत पूर्वाधार निमार्ण एवम् पुनःस्थापना कैके पीडितहुक्रनहे संरक्षण ओ सम्भावित जोखिम न्यूनिकरणके लाग ६९ लाख विनियोजन करल बा ।

सुदूरपश्चिम सरकारसे प्रस्तुत करल बजेटके पूर्णपाठ

आर्थिक मामिला मन्त्री माननीय प्रकाश रावलसे सुदूरपश्चिम प्रदेश सभा समक्ष प्रस्ततु करल आर्थिक वर्ष २०७९/०८० के बजटे वक्तव्यके पूर्णपाठके लाग यहाँ क्लीक करी ।