कालिकासे नवनिर्वाचित जनप्रतिनिधिहुकन बधाई कार्यक्रम

पहुरा समाचारदाता
हसुलिया, १ असार । कालिका प्राविसे कैलारी गाउँपालिकाके नवनिर्वाचित जनप्रतिनिधिहुकन शुभकामना ओ बधाई कार्यक्रम करले बा ।

बुधके रोज उ विद्यालयसे सार्वजनिक सुनुवाई कार्यक्रमके अवसर पारके नवनिर्वाचित जनप्रतिनिधिहुकनहे शुभकामना ओ बधाई कार्यक्रम करल होे । गाउँपालिका अध्यक्ष राजसमझ चौधरीके वडका पहुना ओ उपाध्यक्ष भगवतीकुमारी चौधरीके विशिष्ट पहुनामे कार्यक्रम करल बा ।

ओस्टेक कार्यक्रमके विशिष्ट पहुनामे नेपाली काँग्रेसके केन्दीय महाधिवेशन प्रतिनिधि मनिराम बखरिया, मायादेवी चौधरी, नेका क्षेत्र नम्बर ३ के क्षेत्रीय सचिव रमेश चौधरी, पूर्व महाधिवेशन प्रतिनिधि तथा महासमिति सदस्य भरतराम चौधरी, नेका कैलारी गाउँपालिका सभापति कृष्ण प्रसाद चौधरी, कैलारी गाउँपालिका–७ के अध्यक्ष तथा प्रवक्ता दिपेन्द्र बहादुर बम, टमान वडाके अध्यक्ष, कार्यपालिका सदस्य, वडा सदस्य, नेका क्रियाशिल सदस्य बेचन चौधरी, समाजसेवी सत्यदेव चौधरी लगायतके उपस्थिति रहल रहे ।

कालिका प्राविके विद्यालय व्यवस्थापन समिति अध्यक्ष ऐतवारी थारुके अध्यक्षतामे हुइल कार्यक्रममे विद्यालयके प्रअ धनिराम चौधरी नवनिर्वाचित जनप्रतिनिधिहुकन माला ओ खादा सहित बधाई ज्ञापन करल रहिट । कार्यक्रमके सचालन लक्ष्मण चौधरी करल रहिट ।